原本有250磅的肥妹龍小菌，最近終於除罩示人，成功減去百幾磅肥肉，龍小菌要keep住運動防反彈，仲喪玩最近hit爆嘅空中瑜伽（Aerial Yoga）。
雖然自言身形未夠完美，連手臂都唔露得住，但緊身運動衫褲，配合倒吊、拱橋嘅瑜伽動作，龍小菌天賦巨胸都現晒形，龍小菌仲話畀多2個月時間，到時可以着背心仔！逐啲露，吊人癮喎！
龍小菌肯的起心肝變索女，原來因為有個被hurt經歷，她說︰「試過俾自己暗戀嘅男仔叫減肥，佢話其實我瘦咗都應該幾靚，但減咗肥先會追我囉。」中學時期的龍小菌，體重高達250磅，梗係冇拖拍啦！不過減肥期間，那位男同學連眼尾都冇望過佢。被hurt之後，龍小菌身體亦發出警號，膝頭及關節痛，夜晚仲試過睡眠窒息，真係唔減唔得！
倒吊空中嘅龍小菌，雙手打開，雙腳則夾實，姿勢十足蜘蛛俠。
除下面罩嘅龍小菌，樣靚聲甜，惟獨手臂包到實，扣分。
龍小菌曾因長期幪面，導致身體變差，又搞到個肺花咗，最終先肯除罩見人。
首度big爆上圍除罩之後，龍小菌被人大讚似苟芸慧，高登仔對佢嘅身材開始有唔少遐想，龍小菌仲即刻搵綠魔Karl幫佢扮靚靚。上週四（11日），龍小菌到英皇書院免費試堂，白色喱士短裙加黑絲襪索晒見人，放學之後，班學生哥仲爭住同佢影相呀！
keep住身形，有玩過瑜伽的龍小菌，迷上近日hit爆的空中瑜伽Aerial Yoga，週日到中環上堂，現場所見，龍小菌好多動作都做到，仲俾教師讚有柔軟度；不過，經理人兼緋聞男友邵子風就好緊張，全程喺旁邊金睛火眼，龍小菌唔覺意露出些少肉，他就即刻衝前「出手」整理衣服。
雖然運動衫包到實，但做凌空拱橋時，先發現龍小菌「禾稈冚珍珠」，有料到！問龍小菌點解咁驚露手臂，她說︰「暫時未滿意手臂嘅粗幼度，所以都會遮住手臂見人，畀多2個月時間我啦！」
倒掛前仰嘅龍小菌，動作大致上都可以跟足導師，仲唔覺意show到隱藏巨胸。
首次試玩嘅龍小菌，初時都笨手笨腳，好多時要導師出手相助。
龍小菌（右）讀書時肥到爆，但暗戀嘅男同學叫減肥，又真係幾hurt嘅！
龍小菌試做空中瑜伽動作時，經理人邵子風全程傍到實，眼見小菌需要幫忙時即上前，兩個唔係拍拖都無人信啦！
江美儀︰唔清楚啲合約
12年龍小菌簽約吳君如細佬吳君祥同女友江美儀所成立的黃金時代娛樂，未夠一年就以「政治立場」不同解約。《忽然1周》圖片
榮升補習天后嘅龍小菌，脫罩之後幾乎日日見報，成功嘅商業策略，背後男人邵子風當然機關算盡。但有說龍小菌去年8月，跟吳君祥（吳君如細佬）的黃金時代公司簽咗約，為期6年。
聽到合約問題，坐喺隔籬嘅邵子風搶住答︰「總之𠵱家完咗約，因為簽幾多年合約係保密嘅，同埋唔清楚佢（吳君祥）講咗咩！其實佢哋都好錫我，但最重要係我哋政治立場唔同。」週日，本刊致電前老闆娘江美儀，她說︰「我真係唔清楚啲合約，你哋問番我男朋友啦。」而吳君祥在電話表示︰「我只可以講有6年約，（會唔會鬧上法庭？）咁梗係唔會，其他嘢唔講喇。」6年合約在手，吳生都肯放走隻金蛋？
唱〈石頭記〉教中文龍小菌於6月加盟英皇教育，以「名師」身份執教。但未教之前，就被網友發現佢接連寫錯別字，並質疑教院畢業嘅佢教學能力不足。首堂試課日，龍小菌教導學生寫作方面嘅修辭手法，一教到叠字時仲大唱達明一派〈石頭記〉（歌詞勁多叠字），之後見學生冇反應，嬲爆爆咁話：「你哋係咪嚟睇龍小菌㗎咋？」
英皇教育以「星之加盟」來宣傳龍小菌新嘅補習班，收費拍得住補習天王。
龍小菌喺7月推出個人著作《我係龍小菌》，書中內容主要講事業發展歷程同故事，遲吓會出本減肥書。
星：「同學覺得好開心，估唔到龍小菌識唱歌仲識教書。」
William：「覺得小菌教得好投入，有耐性，仲舉咗好多例子。」
空中瑜伽去水腫一眾女星包括Janice Man、Miki楊愛瑾同陳嘉桓原來都有玩開空中瑜伽，皆因好玩之餘，又可以暢通淋巴自然去水腫。
Janice Man最近迷上健身和空中瑜伽，態度認真之餘，動作仲有板有眼。
Miki啱啱先接觸空中瑜伽，但似乎擺pose居多，睇嚟都係有姿勢冇實際。
有詠春底子嘅陳嘉桓，喺空中一展一字馬姿勢，柔軟度極高。
