現年35歲嘅唱作人恭碩良同47歲嘅林憶蓮拍拖三年，近日傳出佢哋有意年底拉埋天窗，姊弟戀修成正果。喜事近嘅恭碩良，大前日6點幾撇甩憶蓮母女，佢先喺銅鑼灣會合一名年輕女伴，佢哋去咗糖街一個商場裏邊嘅改衫店，恭碩良入到店，好心急除咗身上嘅牛仔褲，完全冇顧慮隔住玻璃門會俾人乜都睇晒。恭碩良除褲後即露出格仔孖煙囪，同佢件黑白格仔背心咁鬼襯，內外呼應。
恭碩良着番條補完嘅牛仔褲時，唔小心晒埋腰間豬腩肉（箭嘴示）。有傳恭碩良年底會迎娶拍拖三年嘅林憶蓮。
𤷪𤺧爆粗
恭碩良將條有體溫嘅牛仔褲交咗畀改衫女師傅，原來佢條褲爆咗軚，唔怪得要咁趕搵人幫佢補，跟住恭碩良就當眾着咗條紅色波褲，同行嘅年輕女伴可能覺得有啲尷尬，行開咗一陣，大約20分鐘，女師傅補完褲畀恭碩良着番，佢條牛仔褲前面大髀位置原來都好多窿窿，不過呢啲窿係款式唔使補。
恭碩良着番條褲又猛用手check吓爆軚部位補成點，佢咁啱望出玻璃門發現有記者影相，搞到好𤷪𤺧，仲好唔高興爆粗㖭。
【急急除褲】恭碩良大前日同女伴去改衫店補褲，仲當場除褲，露出着住孖煙囪嘅巨躉。
from:
http://hk.apple.nextmedia.com/entertainment/art/20130701/18317848
