今年49歲嘅林憶蓮同38歲恭碩良拍拖4年，雖然兩人年齡相差11載，但呢對「姊弟戀」發展得好好喎，恭碩良更由最初好抗拒畀記者影相，到𠵱家即使發現記者都會笑笑口，同憶蓮越愛越甜蜜。
前晚接近10點，恭碩良揸車載女友去數碼港拍拖睇戲，不過今次唔係二人世界，同行仲有一個年輕男，恭碩良抵達戲院門外，先畀憶蓮同年輕男落車入戲院買戲票，憶蓮同年輕男明顯好熟絡，邊行邊傾，年輕男仲不時講到大聲笑。
【興奮起舞】
恭碩良心情大靚，突然起舞。
【無懼燈膽】
憶蓮同男友恭碩良睇戲，仲約埋年輕男友人三人行。
掃10分鐘小食
前晚佢哋睇湯漢斯主演嘅電影《換諜者》，套戲係10點鐘開場，但佢哋抵步時已經差唔多係開場時間，所以憶蓮一入戲院即刻飛奔去買戲票，恭碩良泊完車後小跑步急急會合女友，但入場前三人喺小食部掃小食掃足10分鐘。
而恭碩良前晚心情相當好，會合憶蓮後全程都笑咪咪，又不時用手輕攬女友纖腰，著牛仔褲青春打扮嘅憶蓮就似足小女孩，全程依偎喺男友身邊。不過，相信佢哋前晚睇戲前仲未食晚飯，事關三個人除咗買咗3大杯汽水，仲買咗熱狗同埋幾包爆谷，好似真係好肚餓！
採訪、攝影：徐錦池、梁繼光
憶蓮落車之後急急買飛，唔知揀唔揀到靚位？
年輕男伴買完嘢食，率先食爆谷。
from:
http://hk.apple.nextmedia ... 151023/19343412
