肥媽（瑪利亞）14年前嫁俾葡萄牙籍老公Rick時，撞正母親不幸離世，搞到當年結婚唔可以大事鋪張。今年，肥媽為咗一圓擺酒心願，加上有相士指點迷津，話要為老公搞紅事沖喜，於是上周六（15日）佢就喺佐敦木球會筵開16席招呼親友。
身穿黑色套裝嘅肥媽，原本大騷「震撼事業線」，可惜老公嫌sexy得滯，所以肥媽臨時喺前面加咗塊黃色布遮住。前面冇睇頭，肥媽惟有戮力show off佢啲貴氣配件。
斟新抱茶係例牌菜，着住裙褂嘅肥媽亦零舍醒神，略嫌一對新人同奶奶個甫士有啲生硬。
肥媽事先張揚話晚宴有得「食貴D」，但記者發現當晚只係提供西式自助餐，山珍海味欠奉，只係得parma ham同海鮮凍盤叫做貴價貨色，勝在紅、白酒同香檳任飲，總算食得吓。講真一句，當晚出席嘅賓客又點會志在食吖，主要都係俾面肥媽嘅啫！所以肥媽都好識做，戴咗過千萬嘅翡翠同珍珠見人，喺台上同老公又唱又跳，似登台多過擺酒囉！
婚宴場地唔算大，自助餐枱只得一張咁大把，勝在無限添加，唔算食得豪，但至少唔係街市貨色。
珍寶珠回禮擺酒當然要回禮俾啲賓客，媽咪姐以前見過蜜糖、新人結婚相等，但肥媽就送萬樂珠、朱古力同珍寶珠，真係好有心思喎！希望唔係贊助商送出㗎啦！
