最近無綫黃金時段兩線劇集《神探高倫布》同《金枝慾孽貳》收視插水式創低位，真係沒有最低，只有更低，連處境劇《愛．回家》嘅收視都贏佢哋，其實仲有另一個收視奇葩，就係肥媽瑪利亞同陸浩明主持嘅《食平D》，因為教師奶點整平靚正嘅餸而有捧場客，平均收視有20點，有成128萬觀眾睇㗎！
日前肥媽同陸浩明再次出動，去到筲箕灣街巿，走入大街小巷買餸搵食，街坊一擁而上嚟學嘢，仲親眼睇住肥媽點樣買晒錄影四集節目嘅餸菜材料，都唔使400蚊。肥媽帶住大家竟然搵到最平20蚊買到七條馬友魚，真係寶物難尋！
肥媽同陸浩明四圍「捐」，務求買到最平最靚嘅餸菜。陸浩明同肥媽去街市拍節目，吸引唔少街坊湊熱鬧。
肥媽負責尋寶，陸浩明負責揸數，好夾！
陸浩明自嘲小學雞
七歲入廚嘅肥媽話自己最擅長煮大鑊飯：「我屋企人多，六個仔女十二個孫，每人食飯點一樣餸，我都唔使諗煮咩，而且我啲家人住唔同地方，所以真係去晒咁多街巿買餸煮飯畀仔女同孫食，有乜辦法唔知價。」陸浩明就跟住肥媽做揸數畀錢，自嘲入廚係小學雞程度。
有時肥媽買餸平到有錢剩，仲可以「打斧頭」有錢落袋，肥媽好大反應話：「唔打斧頭就死啦，點當家呀！尤其喺以前嘅年代，我啲小積蓄都係靠打斧頭剩落，唔打斧頭唔係女人呀！」唔怪得肥媽咁受師奶觀眾歡迎啦！
from:
http://hk.apple.nextmedia.com/entertainment/art/20130513/18257786
