羅敏莊和梁梓禧老友鬼鬼，最近拍檔為網上烹飪節目做主持教煮懶人餐挑戰肥媽（小圖）。
陳國邦兩個多月前向無線發公開信宣佈離巢，雖然日前已決定回歸拍劇，但之前被老公大讚為頭家努力賣唱搵錢的羅敏莊（Mimi），仍然落力賺錢，最近更殺入師奶界同肥媽搶飯食，孖老友梁梓禧（前名：梁奕倫）替出版社網站主持烹飪節目，日前與梁奕倫到街市買餸，海鮮檔老闆得悉不是無線節目更即時全數免費，陳國邦則到拍攝現場探班撐老婆，兩公婆當眾錫錫sweet到爆！
Mimi一向喜歡入廚，她說：「其實呢個節目係想教人整懶人餐，啲餸唔會好複雜，好以今日整嘅醉蝦，都係好容易就做到。」而做Mimi副手的梁梓禧，他笑指自己正正就是懶人一族，所以拍這個節目對他幫助好大：「我之前搬出去住都係冇飯一族，一定係出街食，𠵱家返屋企住就係80幾歲嘅老竇煮，有時都唔係幾好意思，所以都要學番一兩味餸傍嚇身。」
肥媽 資料圖片
羅敏莊指第一集教煮的醉蝦是老公最愛，每次都讚不絕口。
海鮮檔主力撐羅敏莊不是拍無線節目，免費送蝦。DV圖片
陳國邦大讚老婆羅敏莊廚藝了得更即場送吻。DV圖片
老公探班錫曬
當日拍攝之前，Mimi與梁梓禧齊齊到街市買餸，一班檔主知道兩人要買餸拍攝節目都落力推介不同食材，其中一檔海鮮檔檔主更豪爽地送出一斤蝦給Mimi，並哈哈笑說：「如果係無線我就唔畀你，你唔係無線我就畀你啦！」
事後Mimi都表示多謝街坊支持，她說：「平時買餸都嚟呢個街市，佢哋個個都好好，亦知道香港𠵱家得番一個電視台，都好支持其他媒體。」而陳國邦當日專程往探班，除了即場試食兼大讚老婆一百分，兩公婆還當眾咀嘴打情罵俏甜到漏。
採訪：小米
攝影：陳俊強
from:
http://hk.apple.nextmedia ... 151229/19430159
