林峯靠晒劉松仁身在橫店趕拍《陸小鳳與花滿樓》嘅林峯，雖然冇「吳七愛」BB喺身邊，不過佢都不愁寂寞，晚晚煲劉松仁N年前拍嗰套《陸小鳳》嘅VCD呀！
唔講唔知，呢套VCD原來係峯媽嘅珍藏。峯媽係劉松仁超級忠實粉絲，佢知道個仔要演陸小鳳後，開心到震，即刻喺櫃底摷番呢套有錢都未必買得到嘅那些年《陸小鳳》出嚟，俾阿仔惡補。講開《陸小鳳》，林峯嘅劇價又再創新高，每集成50萬，唔怪得無綫肯放生啲小生返大陸拍劇。
好似無綫之前幫林峯接咗nowTV劇集《大漢賢后衞子夫》，無綫計過條數，nowTV冇直接利害衝突，又賺成千萬，抽佣好和味呀！之前有傳林峯收山，不過媽咪姐就收到風，話無綫近日戮力同林峯續約，條件仲傾得七七八八㖭！呢嚿「峯峯豬」咁肥，無綫點會放走。
林峯睇劇本都睇到呆呆哋，日夜係咁拍，都咪話唔辛苦㗎！
單單拍兩、三個劇，連埋廣告、巡迴同登台，林峯今年保守估計淨袋3千萬人仔，唔怪得BB點大咬，林峯多多都殺得起。
最近千語BB借周刊反駁收林峯名牌，仲話自己都有送figure俾男友。即係咁，攞男友俾嘅附屬卡買番佢鍾意嘅figure，都算送嘅！
