大台是非多多嘅新劇《使徒行者》終於煞科，早前林峯同佘詩曼拍埋最後嘅外景。未埋位前，阿Chok峯把握時間攞住塊鏡左照右照係咁照，男人老狗，佢貪靚嘅程度真係勁過女人！
好啦，照到塊鏡差唔多爆嘅時候就埋得位，呢場戲講Chok峯要抱住阿佘跑一段路，唔知係阿佘太重定Chok峯唔想整亂自己個頭？佢抱住人嗰時硬晒軚，媽咪姐現場睇到阿佘喺Chok峯手上搖搖欲墜咁款，認真牙煙呀！導演一嗌cut，Chok峯即刻掟阿佘落地，仲大嗌﹕「吖！好重！」搞到阿佘鬼咁尷尬。
其實話晒人哋都係女仔，你大大聲話人重，好冇風度囉，零分呀！
有時間照鏡，不如埋位前鍛煉吓，好過之後聲大大話人重吖。
導演嗌cut，Chok峯即刻掟阿佘落地，仲要偷笑。
大家睇吓，阿佘瘦到成條籐咁，Chok峯真係削啲囉。
