啱啱前晚喺澳門華鼎獎中奪視帝嘅林峯，噚日一早喺將軍澳戶外停車場，為無綫新劇《使徒行者》拍節目巡禮，講劇中演卧底嘅林峯喺現場同匪徒駁火救出扮佘詩曼嘅林秀怡離開困境。雖然只係拍節目巡禮，不過現場安排一架車彈起再反轉，仲有十幾位臨時演員扮飛虎配合林峯演出，相當大陣仗。
拍攝嗰陣林峯開槍同匪徒駁火，私家車仲反彈倒轉。雖然林峯只係拍節目巡禮，但都有十幾位演員陪襯。
未同BB慶祝
林峯攞咗視帝有冇同女友吳千語慶祝？佢話：「噚晚返到嚟成凌晨兩點幾，沖完涼就瞓，慶唔慶祝順其自然，不過佢（千語BB）有恭喜。」升呢做視帝會唔會加價？林峯話冇諗過，不過想同唔同嘅電視人合作。
咁講係咪意味未來更多時間向外闖？林峯老實話：「都可以算係向外闖，發展幾好，真係多謝TVB，人哋搵我都係經TVB，公司再幫我安排。」不過有冇遺憾仲未做無綫視帝？林峯話：「總之有獎係bonus，最緊要觀眾留意自己演出。」劇中林峯演卧底，會唔會似謝天華「Laughing哥」？佢笑話：「佢chok過我，佢瞓住都chok，我就唔會，因為會『瞓厲頸』。」
另外林峯有份主演嘅恐佈片《詭嬰》，會喺呢個月31號上映，戲中林峯有唔少動作場面佢都係親身上陣，不過惟獨揸電單車，因為佢冇牌要假手於人。呢套戲千語BB都有份做，不過同林峯就唔多對手戲。
from:
http://hk.apple.nextmedia ... 131009/18455427
