情場事業兩得意嘅陳茵媺（Amiee），近日榮升女一拍無綫新劇《單戀雙城》，騷表現係時候！周日（10日），Amiee同楊明喺九龍灣拍分手戲，拍之前佢兩個傾得好鬼開心㗎，男方望住女方嗰對識笑嘅腰果眼，直情冧到投晒降！但一嗌roll機，Amiee即時交晒戲，拍咗兩、三個take，導演就收貨。唔知係咪因為有個視帝男友不時過幾招呢，Amiee跟手拍跪地喊爆，再加落大雨場面，只見佢隨住人造雨景愈落得勁，愈喊得厲害，仲七情上面喪拍石屎地，打到手仔都紅晒，唔講真係以為佢同豪豪鬧分手囉。
雖然楊明冇份淋濕身，但佢好有風度，等陳茵媺拍完，即時幫佢攞毛巾，又拎水杯。係嘅，對住喊得咁慘嘅靚女，係要獻多少殷勤嘅！
等roll機時，陳茵媺同楊明傾偈傾唔停，細聲講大聲笑，估唔到咁啱嘴形喎！
Baby，咁我呢？（設計對白）
呢頭同楊明傾偈笑晒，跟住一roll機，陳茵媺已經喊到跪咗喺對方腳邊，途人都忍唔住望兩眼。跪地都唔夠，無幾耐仲落埋雨，Amiee仲愈喊愈大聲，勁慘。
兩條大水喉就係一場大雨喇！搞到陳茵媺由頭濕到落腳，好彩有楊明幫手拎毛巾拎杯，靚女真着數。
