「愛妻號」吳彥祖（Daniel）一向錫老婆，為了老婆Lisa S.今年安心生蛇女，吳彥祖5月將全面停工休息一年，全職陪老婆兼做湊仔公。
為了即將出生的BB，吳彥祖去年密密拍戲搵定奶粉錢，更孭飛拍了《王的盛宴》及耗資2.5億的《太極》二部曲。本來他對上述大片寄望甚殷，可惜票房唔掂，加上要照顧有產前抑鬱跡象的Lisa S.，吳彥祖一度壓力爆煲，更自爆要睇心理醫生。近日趕拍《魔警》的吳彥祖，惟有向岳父及岳母求助，急召兩老由美國來港照顧愛妻。
肚凸凸
側面睇，佗住5個幾月嘅Lisa S.終於見肚，身形明顯豐滿不少，以往得26吋腰的她，現時估計有34吋左右。
現龍躉~Lisa S.除了上圍跳級外，pat pat亦大咗幾個碼，起碼40吋。行了近兩小時的Lisa S.終於停下來，坐在街邊的花槽唞唞。
外父、外母，唔該晒！
（設計對白）
37歲的Lisa S.，懷有5個多月蛇女，增了近廿磅。而屬高齡產婦的她，早前曾自爆因荷爾蒙失調，經常無故哭泣。
「Lisa有時睇睇嚇電視都會喊，半夜醒咗就好難瞓番，呢啲咪就係產前抑鬱先兆。Daniel好緊張，即刻帶佢睇醫生，仲叫埋外父同外母嚟香港照顧老婆。皆因佢依家日日開工，怕自己冇時間陪老婆，加上有咗小朋友之後佢哋兩個開始禁慾，Daniel為免老婆胡思亂想，一收工即返屋企。」Lisa S.密友話。
上週六（19日）黃昏，本刊拍到Lisa S.父母陪女兒到中環荷李活道的畫廊遊逛散心。身形高大的Lisa S.終於見肚，笑容欠奉的她，全程好像心事重重。她父母不斷撩Lisa S.說話，但Lisa S.似乎唔多想講嘢。兩老十分細心，上落樓梯會傍實愛女。三人行了個多小時，Lisa S.坐在街邊的花槽休息五分鐘左右，再行多個半小時便返家。
自爆睇心理醫生
吳彥祖為新片《魔警》地獄式減肥。減去十多磅的他，因公私兩忙兼唔碰得老婆，唔怪得壓力爆煲，話要睇心理醫生
在新片中，吳彥祖飾演魔警，劇情明顯取材自徐步高事件，佢要同張家輝大鬥演技。
趁老婆未生住，吳彥祖繼續把握機會搵錢。11日，他又為《魔警》開會。近期他頻頻戴帽，脫髮問題看來頗嚴重。Lisa S.剛有喜，吳彥祖即到電器舖購買新款吸塵機，真係廿四孝老公。
推戲陪老婆
「Daniel不嬲係緊張大師，尤其佢知道老婆情緒麻麻，一直好擔心。五月佢會全面停產，就算之前杜琪峰搵佢拍《單身男女II》，麥兆輝同莊文強又搵佢拍《竊聽風雲III》，佢都推曬。本來《竊III》年頭拍，但部戲依家要押後到年尾，Daniel諗都唔諗就推咗。」知情者說。
以往在影壇順風順水的吳彥祖，最近可謂頭頭碰著黑，本來以為在內地名導陸川的大片《王的盛宴》中擔正，同劉燁及張震大鬥演技。豈料最後他的戲被大幅刪剪，由主角變成大配角。而剛落畫的《王的盛宴》，在香港票房只收33萬4千，內地亦僅收5千多萬，票房甚差。
除了《王的盛宴》，他與馮德倫開設的製作公司「Diversion」，找來2.5億資金拍攝的高成本電影《太極》二部曲亦唔理想，兩集票房收近3億，七除八扣僅是平手離場。擔心自己變成票房毒藥的吳彥祖，近日事業失意加上照顧情緒不穩的老婆，導致壓力爆煲。難怪佢呻爆，要搵心理醫生開導。
就母親來港照顧，Lisa S.在週三（23日）直認：「媽咪同繼父係啱啱喺美國返嚟！嚟緊老公會休假一年，等我生咗BB，我哋會去美國relax下，佢已經儘量抽時間陪我，幫我按摩放鬆心情。」
記者週三再問到Lisa S.還有沒有突然哭泣時，她避忌說：「依家好番好多，冇事啦。」上畫的《王的盛宴》，吳彥祖戲份不斷被刪，相反張震就被加重戲份，難怪宣傳時，吳彥祖只是強顏歡笑。
易喊屬產前抑鬱
朱茵產前經常無故哭泣，是產前抑鬱的病徵，幸生B後回覆正常。
據婦產科醫生郭志偉指出，吳彥祖夫婦看來都有產前抑鬱。「係佢哋太緊張啫。女方依家有咗5個幾月，係懷孕中期，荷爾蒙轉變緊，依家孕婦好需要家人嘅支持同開解，丈夫要多啲時間陪伴太太。
「輕微嘅產前抑鬱係會喊、食慾不振、瞓唔到，嚴重嘅自殺都會有。通常做產檢時，產科醫生都會留意到孕婦有冇產前抑鬱，有需要就會轉介去睇心理科。BB出世後，如果湊唔掂BB，女方都有機會有產後抑鬱。」
