89年亞姐出身，憑42吋長腿成為icon的萬綺雯，去年由亞視過檔無綫拍第一套劇《老表，你好嘢！》即做女主角，拍住有收視保證的視帝郭晉安，相比其他過檔的「亞視人」，待遇明顯優厚得多。
花旦買少見少，無綫希望萬綺雯由部頭約改簽成「親生女」。據知無綫以5萬一集的「頂級花旦價」利誘萬綺雯簽三年經理人合約，劇價直逼視后胡杏兒。樂小姐更直認不諱：「我好鍾意萬綺雯，好想簽佢（親生女）！」樂小姐恨女恨到發燒喎。
42歲的萬綺雯憑98年《我和殭屍有個約會》飾演馬小玲一角彈起，其42吋長腿無人不知，成為亞視當紅花旦，00年與編劇陳十三結婚後淡出電視圈。不過，去年戲癮大發，轉會去無綫拍《老表，你好嘢！》，劇集於周一（14日）首播。
與無綫人打成一片~周一（14日），主角之一王祖藍請食飯，《老》演員及工作人員都俾面到場，順便一齊睇電視首播。萬綺雯與劇中主要演員已打成一片，完全融入無綫。
監製爭住用
去年視后胡杏兒遠赴海南島拍《衝上雲霄2》，罕有三點式上陣搏到盡，不過萬綺雯個勢直逼胡杏兒，胡一姐地位隨時不保。
「亞視人」加盟無綫拍劇即做女主角，前無古人。據知無綫最近密斟萬綺雯簽三年經理人合約，出到5萬元拍一集劇的天價，直逼視后胡杏兒6萬元一集。知情者透露：「蚊蚊（萬綺雯）好受無綫監製歡迎，已拍嘅兩套劇監製對佢讚不絕口。樂小姐親自打電話俾蚊蚊叫佢考慮簽經理人合約，仲出到5萬蚊一集。價錢咁吸引，蚊蚊當然心郁郁啦！有監製收到風，已經爭住book蚊蚊做女主角。不過蚊蚊講明唔想飛起跟佢多年嘅經理人，就算簽做親生女，都要俾番依家個經理人跟番所有嘢，而且佢都要老公陳十三批准先得。」
其實親生女合約都可以沿用自己經理人，不過細節上比較複雜，無綫為表誠意，亦表明萬大事有商量。至於萬綺雯一直想家庭事業兩者取得平衡，與編劇老公陳十三結婚13年一直恩愛，兩人更共用微博，經常上載旅遊照片晒幸福。不過近日有報道指陳十三因吸煙過量，導致結婚13年來依然不育。
生仔順其自然
樂易玲：「我係好想簽佢！」（真實對白）
周一（14日）萬綺雯出席《老》飯局大笑回應：「我同老公講你俾人偷影咗，話你『唔得』呀！佢講笑話今次真係一額汗，仲以為影到佢攬住條女喎！笑死我！其實我冇話過唔生仔，順其自然啦！」對於無綫以5萬一集利誘簽三年經理人合約，萬綺雯直認曾與無綫接觸過：「我哋係有傾過合約嘅嘢，不過都係好初步，嚟緊仲未有劇拍住，我想同老公去旅行玩吓先！」
樂小姐亦透過電話回應，直認好想簽萬綺雯：「我係好想簽佢（親生女），不過仲要坐低慢慢傾細節。我好鍾意佢（蚊蚊），以前亞視啲女藝員我淨係留意佢一個！如果佢肯簽，咩嘢都有得傾。」樂小姐偏心到講埋出口，若然萬綺雯他日有機上台攞視后，必定第一個多謝樂小姐！
長腿人妻有觀眾緣
《老表，你好嘢！》周一首播已有31點收視，反應都算熱烈。萬綺雯亦非常有觀眾緣，不少網友讚她keep得好兼有新鮮感。難怪無綫為簽萬綺雯，欲以天價5萬元一集重金禮聘她。
《老表，你好嘢！》2萬一集
萬綺雯加入無綫的首部劇《老表，你好嘢！》共20集，其拍劇酬勞約2萬一集。
《好心作怪》3萬一集
上月剛煞科的新劇《好心作怪》，萬綺雯飾演三哥苗僑偉老婆，酬勞已升至3萬一集。
防腐24年
42歲的萬綺雯由89年選亞姐至今已24年，樣貌身材都冇乜變過，keep住童顏之餘，招牌42吋長腿依然見得人，係圈中防腐一族。
89年
當年18歲的萬綺雯在婚紗店打工，影了輯相做生招牌，被前亞姐總監劉娟娟見到，力邀參選並獲亞軍，當年面圓圓還有點baby fat。
00年年
亞視重頭劇《我和殭屍有個約會》添食拍第二集，女主角萬綺雯三點式上陣，以當時電視尺度算大膽。
03年
與老公陳十三慶祝結婚三周年，去泰國二人世界，萬綺雯在facebook內公開三點式噴血照片。
12年
去年尾與老公遊峇里，在facebook大晒fit爆身材，老公揸相機，萬綺雯企在岩石上大騷長腿。
與老公結婚十三年經常晒幸福，兩人還共用微博，這是「陳十三，萬綺雯」現時的微博大頭相。
