萬綺雯（蚊蚊）、呂頌賢、楊怡、梁琤、朱慧敏、黃德斌、鄧健泓同黎燕珊，噚日喺葵湧為舞台劇《我和春天有個約會》綵排，冇人再講楊怡頂咗胡杏兒個位繼續執金做巡迴，反而焦點落咗喺同場一對曾於1991年拍過拖嘅舊情人萬綺雯同呂頌賢身上。
問蚊蚊會唔會尷尬？佢話：「之前都合作過一次，喺《法網群英》合作。」楊怡即刻幫口話：「𠵱家乜年代，仲點會尷尬？」呂頌賢唔知係咪飾演蚊蚊嘅男友，但係蚊蚊咁答：「唔好問我啲假設性問題。」口話唔尷尬，之但係合照嗰陣，蚊蚊硬要拉埋楊怡一齊，呂頌賢都開始有少少唔好意思：「唔好搞啦！我有家室㗎嘞！」最後楊怡企喺二人中間合照。
萬綺雯、朱慧敏等演員好認真綵排《我和春天有個約會》。
楊怡話首度參與舞台劇演出非常緊張，要做筆記執生。
做筆記執生
幫蚊蚊解畫嘅楊怡又話：「我哋有姊妹情，今次合作大家熟咗，我同呂頌賢係情侶。」楊怡話今次首度參與舞台劇演出，令佢非常緊張：「我好驚好緊張，怕記唔到對白，蚊蚊話唔會，但係我綵排時試過唔記得，越熟越發台瘟，即刻打自己要記住，自己要做筆記執生。」蚊蚊就讚楊怡叻女：「佢排一個禮拜已經唔使睇劇本。」
講到前晚郭晉安失落視帝，惹來網民鬧爆，楊怡話：「我入行以來第一次冇參加台慶，但都感受到氣氛，得唔到獎嘅出年再努力，其實大家都好努力，安仔一定唔會介意。」至於同安仔喺《致命復活》合作演夫妻嘅蚊蚊就話：「安仔都係平常心，佢都攞過三次。」
撰文：馮仁昭
from:
http://hk.apple.nextmedia ... 161220/19870721
