上月初龔嘉欣突然在微博宣布與拍拖兩年多的鄧健泓分手，當時卻有傳是她搭上了09年香港先生許家傑。本刊收到消息，實情是鄧健泓用情不專，今年7月趁龔嘉欣去橫店拍劇，帶過不同女伴返家，更有住客曾目擊「味之天使」藍莓在男方屋企出現。
上周一（10日），真正小三終於現身。有圖有真相，她竟然是07年港姐冠軍張嘉兒。鄧健泓從寓所駕車載張嘉兒離開，被記者撞破好事，顯得不知所措。據知兩人於去年4月拍《飛虎》時已暗撻。早已知悉的龔嘉欣，只看了記者遞上的斷正照片一眼，便知道戴口罩的新歡是張嘉兒，「佢兩個拍《飛虎》時已經行得好埋啦！」有晒人證同相證，睇怕張嘉兒「小三」之名真係水洗唔清。
38歲的鄧健泓演藝事業一直麻麻，感情生活卻非常豐盛。雖然他並非靚仔，但多年來冧盡不少合作過的女演員，可惜曾與他拍拖的女藝人全部都感情錯付，分手收場。
鄧健泓與細他16年的龔嘉欣拍拖兩年幾，人前人後表現恩愛，女方亦視鄧健泓為結婚對象。但今年7月龔嘉欣為《金枝2》到橫店拍劇一個月，鄧健泓竟然趁機作反，不時帶女伴返家過夜，更與去年4月合作拍無綫劇《飛虎》的張嘉兒撻着。龔嘉欣知道男友背她出軌，多次吵大鑊，最後決定各行各路，即時搬出位於荃灣樂悠居的愛巢。
過夜鐵證
記者連日來在鄧健泓的荃灣樂悠居寓所等候，其40萬新Mini停泊在住戶停車場。戀情被斷正前一晚（9日），兩人一直未有外出。直至翌日（10日，星期一）晚上兩人才由住宅樓層搭𨋢直落停車場，可見張嘉兒在鄧家過夜。
上周一晚9時許，鄧健泓從荃灣寓所駕車出來，身旁坐了戴上黑口罩的張嘉兒，兩人見記者拍照顯得驚惶失措。鄧健泓一度用手遮面；張嘉兒一臉尷尬，眼神閃縮，唔知望去邊好。
12月10日
同車離開
張嘉兒更跣低身耷低頭，企圖避開鏡頭。
發誓還清白
龔嘉欣不但指證張嘉兒與鄧健泓早已行得好埋，仲即場發誓分手不是自己有第三者。終於水落石出，難怪笑得咁開心。
佢哋一早行得好埋！
誇張回應
過夜咁amazing！
曾與張嘉兒拍拖4年的金剛，見到舊愛新戀情的斷正相，眼都凸埋。
拍《飛虎》暗交
鄧健泓與張嘉兒去年中拍《飛虎》同演重案組探員，戲裏戲外都經常一齊。
藍莓食完即棄
鄧健泓冧女向來有一手，有街坊話目擊他多次帶「藍莓」劉俐返家，不過藍莓否認上過鄧健泓屋企。
被屈有第三者
11月初，龔嘉欣在微博單方面宣布分手，有傳有人為了保護形象，向外界放風抹黑龔嘉欣，指她與《更上一層樓》的拍檔許家傑行埋。可憐的龔嘉欣不想出面指證第三者是張嘉兒，惟有白白受屈。今次本刊斷正鄧健泓與張嘉兒過夜後同車離開，算是還她一個清白。
當日（10日）晚上9時許，鄧健泓與張嘉兒離開荃灣樂悠居寓所，搭𨋢直落住戶停車場。當車子駛出停車場，本刊記者上前拍照。鄧健泓笑得尷尬，一度用手遮面。早有準備戴上黑口罩的張嘉兒，起初扮作氣定神閒，不過雙眼非常閃縮，之後更企圖跣低身避鏡頭。兩人沒有交談，鄧健泓亦不肯停下回應，即時踩油撇記者。
其實鄧健泓與張嘉兒去年才開始稔熟，據知情者透露：「佢哋拍《飛虎》時成日行埋一齊，兩個都係演重案組探員，由於唔係主線，所以等多過拍。一個係出名賤男，一個係豬扒港姐，好似特別好傾，張嘉兒又成日搵Patrick譯稿，黐埋一啲都唔出奇。」
情傷暴瘦
近月飽受情傷的龔嘉欣，自分手後暴瘦，體重不足100磅。周日（16日）她在旺角出席活動，着住貼身連身裙的她相當骨感。
08年健康四葉女
四葉女出身的龔嘉欣，雖然冇逼爆上圍，但以青春可愛做賣點，當年身上仍有肉地，其健康性感一直受到宅男擁戴。
獨居將軍澳
活動後，龔嘉欣上保母車離開，途中叫司機落車幫手買外賣，之後返回將軍澳寓所，與鄧健泓分手後獨自過活。
曾向好姊妹哭訴
今年7月，龔嘉欣從橫店拍劇回來，知道自己正印地位不保哭成淚人，更與一班圈內好姊妹哭訴。知情者續說：「紙係包唔住火，嘉欣發現咗張嘉兒介入，即時同宋熙年、姚子羚哭訴，大家都贊成佢分手啦！佢傷心到唔知點同阿爸阿媽講，老人家一直當Patrick係仔，仲諗住佢哋會結婚。」
正當鄧健泓回復自由身，張嘉兒以為可把他私有化時，竟殺出個「藍莓」劉俐，男女關係真係七國咁亂。本刊收到可靠消息，近兩個月有數位住客親眼目擊，藍莓與鄧健泓在荃灣寓所一同出𨋢、一齊放狗及同車數次。每次出現時間都是深夜時分，而且兩人警覺性甚高，鄧健泓一見有住客拎住手機即時怒啤。
喊住講分手
龔嘉欣11月初在微博宣布與鄧健泓分手後，首次見傳媒時淚灑當場，她還維護舊男友說是和平分手。
被屈有新歡
今年7月龔嘉欣到上海橫店拍《金枝2》一個月，點知返港後即時情變，更一度被屈與《更上一層樓》的許家傑撻着
當年有網友將張嘉兒和孔慶祥的「戴后冠樣」作比較。
被嘲豬港姐
畢業於加拿大哥倫比亞大學的張嘉兒，07年由溫哥華返港參加港姐。爆冷奪港姐冠軍當晚，被現場觀眾狂噓，之後更成為網友熱烈抨擊對象。主要攻擊部位都係佢塊Pizza闊面、平庸五官同埋厚切身材。被嘲史上最醜港姐嘅佢，花名仲一籮籮，有「豬扒港姐」、「闊面黃宇詩」及「女版William Hang（孔慶祥）」等。不過呢幾年張嘉兒個樣愈變愈靚，曾被指整容博上位。入行前曾與金剛拍過4年拖的她，更曾與林敏驄傳緋聞。
食盡無綫女
鄧健泓參加97年第十五屆新秀入行，一心諗住出唱片做歌手，點知歌壇企唔住，惟有投靠無綫轉型拍劇。一直處於半紅不黑狀態的他，15年來最大的得着，應該是車輪轉與合作過的女拍檔過電，可見其冧女手段應該唔弱。
97年蓋世寶
加入《閃電傳真機》做主持，與節目拍檔蓋世寶拍拖並同居兩年幾，分手前有指兩人因男方有第三者而吵大鑊，爭吵中鄧健泓被利刀插傷大髀。
00年原子鏸
拍《男親女愛》與同劇演員原子鏸拍拖，有指鄧健泓當時「一拖四」，同時與何嘉莉、蓋世寶和圈外女友Apple拍拖。原子鏸獲悉後一度激動落淚，更被母親鄭佩佩棒打鴛鴦，這段情拖拉四年最終分手收場。
05年李詩韻
03年選港姐並獲「最上鏡小姐」的李詩韻，05年與鄧健泓合作拍《老婆大人2》火速撻着兼同居，不過四年後都是分手收場。更有指鄧在友人面前狂數李詩韻是正宗港女，只懂花男友錢。
10年龔嘉欣
與李詩韻剛甩拖，鄧健泓即被踢爆與合作拍《隔離七日情》的龔嘉欣拍拖，兩人齊齊搬入深井碧堤半島同居，鄧更以290萬買入荃灣樂悠居與女友築愛巢。
12年藍莓
據鄧健泓的荃灣寓所住客爆料，指他與合作遊戲節目《味分天下》的藍莓（劉俐），不時孖住出入寓所，還一起放狗。
龔嘉欣沉寃得雪
周一（17日）TVB台慶頒獎禮，有份角逐「女飛躍」的龔嘉欣明顯情傷未癒，面容憔悴、身形消瘦。但當記者拎出鄧健泓與張嘉兒的「斷正」合照時，她不用一秒就認出鄧健泓身邊的「口罩女」是張嘉兒。
記：認唔認得戴口罩嘅女人係邊個？
龔：認得！佢係張嘉兒嘛！（過程唔夠兩秒鐘）
記：佢哋一齊喺鄧健泓荃灣屋企出來，過夜斷正喎！你會唔會覺得驚訝？
龔：佢哋拍《飛虎》時已經行得好埋，我知道佢（鄧）成日幫張嘉兒譯劇本。佢（張）唔識中文嘛。佢哋一齊我唔覺得出奇囉！我想講，我同佢分手，唔係我有第三者，我可以發誓！（她即時舉起三隻手指發誓）
記：你一早知係張嘉兒介入？
龔：我只可以講我冇第三者，其他人我唔知！
記：當時係咪去到談婚論嫁階段？
龔：佢一早已經叫我父母做岳父岳母，不過……（眼有淚光的她即時被助手拉走）
周三（19日）記者致電鄧健泓，談到他與張嘉兒的關係時，他竟樂意回答：「你哋終於打嚟，等你好耐啦！我同嘉兒現階段係朋友，唔排除有發展空間囉！我哋好熟，拍《飛虎》時我係有幫過佢譯劇本。佢幫吓我，我幫吓佢啦。我依家都38歲啦，我都要結婚㗎，一切隨緣啦！」
鄧健泓講起張嘉兒明顯甜絲絲，態度友善，但當記者問到他與藍莓劉俐的關係時，他即時扯火：「藍莓喎！我同佢一定冇嘢！」鄧健泓似乎非常保護與張嘉兒這段新發展的戀情。
靠愛犬冧女
鄧健泓其貌不揚但冧女甚有計，家有一白一灰玩具貴婦狗的他，利用愛犬溝女，萬試萬靈。𠱁得舊愛龔嘉欣與新歡張嘉兒非常開心。
新歡攬狗洩關係
最近張嘉兒都放了不少攬狗照上微博，明眼人一睇就會發現相中玩具貴婦狗與鄧健泓家中的非常相似。
舊人放唔低
與鄧健泓拍拖兩年幾，龔嘉欣當正男友的一對小狗係自己仔女，分手後她非常念掛小狗，微博中刪除所有鄧健泓的照片，唯獨與狗仔的合照仍在。
張嘉兒喊爆回應
記者致電張嘉兒，她接電話時語氣低沉說：「我知道你哋會打嚟啦！我絕對唔會做第三者㗎！我依家同Patrick係觀察期，係朋友，大家了解吓先……（突然聲音沙啞，繼而爆喊）佢哋都分開咗一排，我真係唔想人覺得我係第三者呀！嗚嗚……我好俾心機做嘢㗎！」她明顯與鄧健泓夾定口供。
身在上海的藍莓亦否認與鄧健泓有交往，不過言語間表示欣賞對方：「我同佢拍《味分天下》識，我冇上過佢屋企喎！都冇坐過佢車，有機會都想坐吓！佢唱歌好好聽，好有才華，做男朋友都唔錯吖！」
至於與鄧健泓拍拖四年的李詩韻，知道前度新歡是張嘉兒，即表現得驚訝。但依然力撐好友張嘉兒不是第三者：「嘉兒唔會係第三者啩，如果佢同鄧健泓拍拖，一定會話我知。（佢今次真係冇話你知喎！）哈哈！總之佢唔會啦，嘉兒係好人嚟㗎，你唔好亂寫佢啦！」
鄧健泓多年來拍拖從未斷纜，女友一個接一個，前度原子鏸與李詩韻都係港姐出身，今次連豬扒港姐張嘉兒都俾佢鋸到，雜食男仲唔係佢？
周二（18日）晚，李詩韻看到舊愛鄧健泓與好友張嘉兒的同車照，表現愕然，不相信兩人拍拖的事實。
淪為大茄
早年有陳志雲撐腰，鄧健泓在無綫發展機會不斷，今年初陳總離巢，鄧即被打入冷宮，最近開拍的新劇《傳愛事務所》，都係做二打六。
