周一舉行的《萬千星輝頒獎典禮2012》，由民意主導，賽果依然惹人質疑。賽前《雷霆掃毒》的「Happy Sir」林峯成為視帝及「最喜愛男角色」獎的頂頭大熱，最後居然一個豬肉獎都分不到，跌到一地眼鏡碎，無綫及通訊局更合共收到200宗投訴，指無綫賽果不公及沒有公開票數。
捧蛋一刻，林峯在鏡頭前難掩失望之情，同晚更陪伴失落視后的徐子珊食消夜，兩個輸家併埋一齊灰上加灰。不過有人歡喜有人愁，再三封帝的黎耀祥就寸寸貢話：「呵呵呵，原來我fans多過佢（林峯）！」夠晒贈「㷫」。
子珊攞豬肉獎 樂易玲傍實安撫
今年無綫頒獎禮突然轉制，安排全民投票選視帝、視后及最佳劇集三個大獎。賽前外間一致認為fans多的林峯會坐定粒六奪視帝，就連黎耀祥亦講到明打定輸數睇好林峯，話自己攞視帝仲難過中六合彩。
輸家冇癮
原本係視帝大熱，結果捧蛋收場，冇癮林峯完騷後雖仍面帶笑容，卻第一個即撇。
木無表情
林峯冇獎攞，人強馬壯嘅fans，卻早已在電視城門外等候。雖然有fans呵番，林峯依然成晚木無表情囉！
贏家風騷
並非無綫親生仔的黎耀祥，居然三連霸奪視帝，令唔少人跌眼鏡之餘，更有人高呼師奶粉絲原來勁過一班妹妹仔。
馬明O嘴
宣布視帝一刻，馬明驚訝O嘴，事後他解釋一直認為林峯有機奪視帝。所以一聽到黎耀祥個名，不期然真情流露。
網友撐賽果
視帝祥攞獎，有網友大讚賽果合理，亦有人話只要唔係林峯攞，邊個攞都冇所謂！
賽前準備橫額
據知，近日在內地趕拍新劇《紫釵奇緣》的林峯，回港出席宣傳活動期間，曾叮囑fans在頒獎禮當天帶定「最受歡迎男角色」橫額，似乎對獎項志在必得。當時林峯表示：「我喺內地趕緊劇，如果收到通知就要返嚟。應該有機嘅！」
強顏歡笑
失落視帝的林峯，影相時一直強顏歡笑，影完即第一個衝返入店內。
贏家得戚
爭贏咗櫈仔的楊怡，事後講到明要挑戰祥仔三連霸，意氣風發。
謙謙陪喊
楊怡上台拎視后寶座時喊晒口，坐在台側的羅仲謙亦不停用手拭淚，激動過自己攞獎。
輸家扁嘴
賽前努力拉票的徐子珊，雖然都有個豬肉獎安慰吓，冇林峯咁慘。不過子珊由宣布視后一刻，由台前喊到台後，走嗰陣仲要扁晒嘴，輸家心情仲未平伏。
高層安慰
食消夜期間，徐子珊一直有樂易玲傍實，冇視后攞但總算有個高層撐。
網友話造馬
賽前楊怡和徐子珊呼聲最高，但唔少網友都插二人未夠班，視后應該由佘詩曼攞咁話。
祥仔出蠱惑
誰知賽前大熱的他離奇墮馬，黎耀祥卻當上三連霸視帝，唔少人認為賽果爆冷。但私底下，視帝祥其實早已勝券在握。早前他便漏口風表示與無綫加簽了兩年合約，順理成章有籌碼傾獎。本刊更收到消息，無綫早有意搵黎耀祥15歲囝囝黎正橋入娛樂圈。知情人說：「公司好多爸爸輩藝人走咗，都想搵番啲父子檔上陣，所以睇中祥仔一家三口咁溫馨。之前公司同祥仔傾過，佢猛咁推話個仔要讀書冇時間，但上次續約再提呢件事，祥仔竟然話若夾到時間，可以叫個仔上吓綜藝節目試水溫。」黎耀祥咁順攤續約，無綫亦識做，造就他第三度封帝，平羅嘉良紀錄。
據知，黎耀祥囝囝黎正橋一直恨入娛圈，而無綫亦有意簽他，雙方一拍即合。
強唧笑容
派獎留甘草
面對王維基挖角，向來忽視甘草演員的無綫，今年忽然加插傑出演員獎，企圖挽留一班資深演員。
可憐與無綫還有三年合約的林峯，被蒙在鼓裏，輸了視帝獎給祥仔，連馬國明都騎住他，奪得「最受歡迎男角色」獎。難怪頒獎禮後，林峯一支箭衝出一廠。記者問他輸給馬國明有何回應，他即收起笑容說：「咁同事攞獎，唔會唔開心嘅！」刻意強調與馬明只是同事，話中有骨。
林峯成晚坐冷板櫈，表現相當失落，眾高層亦識做𠱁番林峯。當晚，他與隸屬同一經理人的「最受歡迎女角色」獎得主徐子珊到灣仔串燒店消夜，無綫高層樂易玲、梁家樹及監製潘嘉德亦齊齊到場安慰兩個輸家。不過林峯全晚心情麻麻，當眾人到門外影大合照時，監製潘嘉德大叫他出來影相都冇反應，要樂小姐連嗌多次：「阿峯，阿峯喺邊？出嚟影相呀！」隔多一陣，林峯才慢慢行出來。
林峯失落，視帝祥卻火上加油，本刊記者問到爆冷得獎時，他說：「呵呵呵！真係我攞，原來我啲fans多過佢（指林峯），真係冇諗過！」表現寸嘴。
徐子珊：好多人唔鍾意我
劇集《天與地》爆冷奪最佳劇集，有指無綫希望藉此獎挽留監製戚其義，但日前戚向本刊記者表明，月底便正式離開無綫，看來無綫今次白費心機。
視帝爆冷，視后卻鬥得難分難解，最後徐子珊奪豬肉獎，楊怡則捧走視后。雖然賽果塵埃落定，但徐子珊就唔多忿氣，扁扁嘴說失獎只因自己人緣差。「我係有失望，亦知有好多人唔鍾意我。其實都好好啦，可以攞嚿嘢（獎座）返屋企，最失望嘅反而係fans同朋友。」至於事業愛情同樣得意的楊怡，當晚攬實個視后獎，早早返歸，與男友羅仲謙過二人世界。
蘇基簽親生仔
除了視帝視后爭崩頭，今年「男配角」同樣競爭劇烈。據知古明華今次奪獎，關鍵是他在無綫的人緣不俗，故取得不少同事支持投票俾佢。相反同是演藝出身的陳國邦，由於經常教人做戲，不少藝員對他早有微言。有幕後透露：「阿邦有時太過嚴肅，教同事做戲。好多人背後叫佢做『邦老師』，話佢當正自己係阿sir。」
陳國邦得不到同事力撐，在票數上自然落後古明華一截，加上在頒獎禮前夕，古明華原來已落實轉簽經理人合約（親生仔）。古明華亦直認將會簽約：「係有同公司傾，但呢一刻我仲未落筆簽。」而嗅到𤓓味的陳國邦雖不是味兒，仍表現出風度地說：「你問我，我梗係恨攞男配角獎，不過佢（古明華）條路難行過我。呢個獎對佢嚟講好重要。」
贏家得民心
古明華憑蘇基一角打低陳國邦奪男配角。宣布一刻，記者聽見後台的工作人員大聲歡呼，可見蘇基比起陳國邦較得民心。
輸家酸溜溜
陳國邦失落男配角獎後，心情低落，拖實老婆羅敏莊火速返家。
網友撐到底
雖然輸俾蘇基，不過唔少網友都話陳國邦飾演的彭三順，永遠係佢心目中的男配角。
《忽周》選舉
賽果大不同
無綫頒獎禮話就話視帝、視后和最佳劇集則是全民投票，仍有唔少人話賽果不公。睇番《忽周》讀者投票結果，唔少獎項得主又確實同無綫有出入：視帝由林峯奪得，女配角江美儀揮低胡定欣，與無綫賽果明顯有出入。
三奶爭贏
黑絲襪江美儀在無綫女配角獎中，連兩強都入唔到，但在《忽周》選舉中，三奶卻大比數拋離其他對手。
《On Call》成大贏家
在《忽周》選舉中，《On Call》在最佳劇集中，竟然由頭帶到落尾，撼贏神劇《天與地》，同時羅仲謙亦憑此劇奪得《忽周》「最佳男配角」選舉，而楊怡除了《名媛》攞視后外，亦憑《On Call》擸埋「女角色」獎，因此在《忽周》選舉中，《On Call》爆冷成大贏家。
羅蘭壓場
無綫頒獎禮，向來對甘草演員唔多重視，因此《忽周》特設資深演員獎，結果眾望所歸由《天梯》羅蘭姐大比數拋離對手勝出。薑果然愈老愈辣。
