無綫前晚舉行《2012勁歌金曲優秀選第三回》，親生仔林峯獲厚待，打破慣例缺席都有獎；由無綫高層余詠珊老公何哲圖揸弗的星煥，更破格跟英皇平起平坐各奪4首金曲，但已約滿星煥子公司的陳法拉，則未受庇蔭慘食白果，輸給鍾嘉欣。
■無綫要力谷林峯攞最受歡迎男歌星，難怪他可打破缺席冇獎的慣例奪金曲。
嘉欣BB呢個伸脷樣真係cute到爆，加埋佢對又白又修長嘅美腿，唔怪得輕易成為宅男女神啦。沒有四大唱片撐腰的無綫，勁歌頒獎禮越來越失色，前晚在將軍澳電視城舉行的《2012勁歌金曲優秀選第三回》星光暗淡，只有容祖兒、蔡卓妍、古巨基、王菀之及鍾嘉欣等撐場。傳獲無綫力谷攞最受歡迎男歌星的林峯，前晚缺席也破例奪金曲獎，但他有接受主持崔建邦電話訪問說得獎感受。
■人攞獎佢攞獎，欣宜（中）個樣鬼咁興奮，基仔（右）就毫無表情，相映成趣。■星煥高層何哲圖全程傍實鍾嘉欣，冷待同公司的欣宜、許廷鏗和胡鴻鈞。
星煥英皇平起平坐
對於林峯奪獎，無綫高層陳家揚解釋：「阿峯幫公司喺外面拍嘢，所以留番個獎畀佢，樂小姐（樂易玲）通知我嘅。」據悉林峯前晚在新加坡做騷。
由無綫高層余詠珊老公何哲圖揸弗的星煥，旗下歌手鍾嘉欣、鄭欣宜、許廷鏗和胡鴻鈞亦獲庇蔭，齊奪金曲，跟與無綫友好的英皇平起平坐各獲4首金曲，曾與嘉欣傳緋聞的何哲圖對她很照顧，嘉欣唱完歌甫落台，何即上前傾偈及護送入後台，相反，跟星煥子公司星揚已約滿的陳法拉，雖有歌曲《一半》候選，卻在沒靠山下食白果。問嘉欣是否打敗法拉得獎？她說：「唱歌唔係比賽，唔好比較太多。」問嘉欣有否信心在總選攞獎？她說：「唔諗，做好自己，過咗世界末日先。」
