今年《十大勁歌金曲頒獎典禮》搞到第29屆，由於TVB與四大唱片關係仍處於膠着狀態，導致頒獎禮愈來愈悶，幾個大獎來來去去得幾個男女歌手分，公信力得啖笑！
據知無綫今年更有意將「亞太區歌手獎」取消，改將「最受歡迎男女歌手獎」增加至金銀銅；而變陣目的是令攞咗3年「亞太區男歌手獎」的林峯得以坐正，奪「最受歡迎男歌手金獎」，擺明車馬谷佢上位。
關心妍奪金曲金
「最受歡迎」變豬肉獎，對歌手來講亦有着數，關心妍可望今年獲頒「女歌手銀獎」。全年hit歌〈失戀哲理〉亦有機會攞「金曲金獎」。
女金祖兒~楊千嬅和謝安琪今年都hea做，難得祖兒最勤力，順利奪金啦！
基仔屈居~古巨基過去連續4年奪「男歌手金獎」，今年要讓位畀林峯，雖然佢首〈戀無可戀〉大hit，但都要慘變阿二。《壹週刊》圖片
下年四台聯頒
不過近日TVB集團總經理李寶安重提「四台聯頒頒獎禮」，更有意一刀切取消《勁歌頒獎禮》，可是商台和新城不想推之過急，最終四台今年依舊各自舉行頒獎禮。
但據知情人士透露，無綫已決定明年度將停止《勁歌頒獎禮》，換句話說，今年將是《勁歌》總選最後一屆。知情者又爆，無綫要趁最後一次機會，捧親生仔林峯攞終極大獎。
「今年仲唔畀個『最受歡迎獎』阿峯等幾時？唔係邊夠分量喺四台聯頒度爭啲大獎？所以今年谷硬佢。」而為了「出師有名」，今年將取消「亞太區男女歌手獎」，而將「最受歡迎男女歌手獎」分設為金銀銅獎，林峯奪金、古巨基銀獎，畀林峯坐正；女歌手方面則由冇人威脅到嘅容祖兒奪得金獎。
記者週一（26日）聯絡英皇經理人霍汶希及TVB製作總監余詠珊，可惜截稿前未有回覆。歌手都唔齊，咪惟有益吓自己友囉！
音統7人定生死
無綫總經理李寶安決定取消一年一度音樂頒獎禮，他表示有意改辦全民直選的音樂頒獎禮
《十大勁歌金曲》獎項有60%賽果由無綫7人音樂統籌委員會決定，包括樂易玲、鄧智偉、余詠珊、麥鎮東、李寶安、陳家揚和區偉林，頭4位都是捧林峯派，大比數賽果仲使多講咩！
下年5月搞聯頒
《勁歌金曲》因欠缺歌手問題綁手綁腳，TVB集團總經理李寶安為修補與四大唱片公司關係，重新建議推行《四台聯頒頒獎禮》取代《勁歌》。據知TVB今年9月時已同3個電台開會，無綫代表更提議大家取消各自的頒獎禮，但被商台及新城拒絕。
本月中四台高層再傾，終於落實明年5或6月舉行首屆《四台聯頒頒獎禮》，預計頒發約40個獎項，部分由樂迷投票直選，TVB主動提出承擔所有製作費。
不過三家電台其實各有所向，成功合作只因有TVB照住啫！
兩大台唔撐商台考慮中
商台行政總裁陳志雲
就算搞「四台聯頒」，商台都會繼續搞《叱?頒獎禮》，有關無綫建議「四台聯頒」，我哋嘅反應係正面同會考慮，而頒獎禮嘅基制仍有待商討。
新城唔樂觀
新城台長朱明銳
大家評分標準都唔同，係唔應該統一，參唔參加係在乎唱片公司同歌手，家媒體咁多未必可以統一，好多歌手連參加嘅機會都冇，唔係個個歌手想聯頒。
