愛貓April性格嬌嗲黐人，結果令陳茵媺一抱難忘。
April
品種：街貓
年齡：3歲半
性別：雌性雖然陳茵媺在加拿大生活期間，曾經與貓有過不愉快的經歷，不過緣份這回事實在不是三言兩語可以解釋，想不到因為一次家訪，陳茵媺不但克服了怕貓的心理障礙，更與貓咪結下不解緣，更自創方法，避免牠們打架。撰文：何慧斯
陳茵媺（Aimee）因為參加香港小姐，06年隻身從加拿大跑到香港，卸任港姐冠軍後，她決定留港發展，向來愛動物的Aimee說：「我本身喺加拿大有養狗，嗰隻狗我由細照顧到大，仲係好辛苦、好努力儲分嘅禮物，我返咗嚟香港，咪由爹哋媽咪照顧，返咗嚟香港成日要開工，加上又一個人住，根本冇時間養狗，本來有人同我講話養貓簡單好多，不過我喺加拿大試過俾貓追咗一條街，見到貓都有啲驚驚哋。」
Alicia
品種：波斯貓
年齡：2歲
性別：雌性
George
品種：街貓
年齡：3歲
性別：雄性人揀貓貓揀人
後來因為一次的家訪，令Aimee對貓一見鍾情：「有一次喺朋友屋企同貓貓玩咗一陣之後，咪諗住試吓養貓，不過我都諗咗年幾先去領養，我怕自己領養咗之後，冇時間照顧，冇理由畀番人，呢個係重大決定，照顧寵物係一生嘅事，所以諗得好清楚。」
回想當日與第一隻貓April見面的情形，Aimee至今仍覺得很回味，她笑說：「嗰次係佢揀我而唔係我揀佢，我同朋友一齊去，見到佢個樣好惡、又好瘦，好似隻異形，你知我驚貓，見到都有啲驚驚哋。點知我抱住佢嗰陣佢嗲到不得了，仲好舒服瞇埋對眼瞓覺，我聽講話有其他人試過抱都冇呢個感覺，所以我成日覺得唔單止人揀動物，其實動物都會揀人，因為佢鍾意你，成日黐住你，你先會揀佢。」
獨居的Aimee養貓後生活上有很大的變化，她說：「未養之前返屋企對住啲牆，靜到不得了，但係養咗貓之後，你會覺得屋企好似有人等你，返到屋企又唔會覺得淨係對住四面牆。好似夜晚睇劇本，貓貓都會坐喺度陪住我，養埋第二隻George之後，佢哋半夜三更仲會喺間屋走嚟走去，雖然係好嘈，但係嘈得嚟又會好開心，你會知道原來間屋有人喺度喎。直到養埋第三隻貓Alicia，Alicia有份拍無綫劇《天天天晴》，拍完之後愛上佢，跟住買埋返屋企，雖然係麻煩咗啲，但係去到邊都有energy。」
George和April相處融洽，經常會睡在一起。
Aimee相當疼錫幾隻愛貓，輕輕一碰已甜在心。
陳茵媺克服怕貓後現養了三隻，April便是其中之一。免打架分房瞓
笑指Aimee應該一早養貓作伴，她笑說：「唔遲喎，初初嚟嗰陣我連自己都照顧唔到，養寵物要啱timing同ready好先得，佢哋連生命都交晒畀你，要用好多時間照顧佢，尤其係George同Alicia加入時，三隻貓成日都打交，April恰Alicia好犀利，可能April同George係街貓，習慣咗爭嘢，平時佢哋好乖好斯文，初初食嘢又爭，爭到連眼都發紅光，我當時都有啲怯。」
Aimee續說：「Alicia仲成日驚到全身濕晒，好似流汗，日日都係咁，跟住我咪分開佢哋喺唔同房瞓，到下晝先放佢哋出嚟玩一陣，玩到咁上下又輪流各自玩，再分開房瞓，呢個步驟要重複做好多次，又要用好多時間同心機，連去街都唔敢玩咁耐，結果用咗好耐時間先可以令屋企環境平靜落嚟，家佢哋相處冇問題。」
貓咪愛玩火
Aimee分享與貓貓相處的搞笑事時說：「佢哋最鍾意偷嘢食，Alicia連香檳都會偷嚟飲，但係佢好易屙，睇醫生都睇咗好多次，反而另外兩隻好strong，醫生話啲名種貓好容易唔舒服，所以要好小心。」
Aimee又說：「George最鍾意玩火，以前我好鍾意點蠟燭，George一見到就會用手撲熄，初初我以為佢知痛玩一、兩次就收手，點知佢繼續玩；April仲試過燒傷pat pat，所以我家都唔敢點蠟燭。」
