《巴不得媽媽》除咗令岑麗香變女神，更令同志角色蘇基爆出，演了廿年綠葉的古明華終於有人識；不過現實往往最殘酷，一向熱愛幕前的古明華，因為14歲女兒患上腎病急需醫藥費，古明華惟有被迫留守人工高3倍的配音組才夠養家。
雖然蘇基爆出，但古明華話：「睇錢份上，都係留番喺配音組好啲！」幾有理想都要面對現實。
《巴不得媽媽》雖然週日（23日）大結局，平均收視有33點，古明華飾演的蘇基依然係城中熱話，有網友甚至要撐古明華撐到11月台慶，直至佢攞男配角獎為止。
古明華收起蘇基look接受訪問，稱為演好這角色花了唔少工夫：「身邊好多呢類乸乸哋嘅朋友，參考佢哋講嘢方法、小動作呀，佢哋都係好好人又斯文，基都可以好好人！」
蘇基在《巴不得媽媽》最終與男人婆姥姥魯玉芬一舞定情，而古佬就話好想拍續集，古明華說：「德哥（監製潘嘉德）話有個角色一定要我演，所以我好畀心機做㗎。」
古明華早前同老婆（左）及女兒Tammi（左二）到尖沙咀影多啦A夢展品，路人小朋友認得蘇基要求合照。Tammi雖然腎病未癒，但看來精神奕奕。《壹週刊》圖片
7,000人工奀
48歲的古佬在無綫捱了22年，拍過近70套劇，不過冇乜邊套有人記得，14年前因為女兒出世，他更要兼任配音員賺多份人工，才勉強養活一家三口。
古佬拍劇人工奀，但因太熱愛演戲而始終冇放棄。可是兩年前女兒Tammi突然患上「腎小球炎症」，發病時會全身水腫，影響排尿功能，試過抽水過量導致虛脫，命懸一線，需要長期服藥及定期到醫院覆診以免導致腎衰竭，當年古明華月薪才得7千蚊，單是乖女醫藥費已經將古明華薪金消耗殆盡，根本無法負擔。
古佬情急之下用頸巾替監製抹頭髮，好彩監製玩得，不過古明華都連聲sorry
古明華90年於演藝學院畢業，同期同學有梁榮忠、詹瑞文等，成名路都比他走得快。
古明華週日在《巴不得媽媽》慶功宴上說：「我只係普通藝員合約，人工得幾千蚊，係唔夠！」當時經過一番掙扎，古佬決定轉到配音組：「配音組人工多3倍，雖然我好鍾意做戲，但為咗養家都冇辦法，拍劇份人工唔夠使，家間中拍吓劇叫做過吓戲癮囉。」
他又說：「我老婆冇打工，阿囡14歲喇，家醫藥費亦唔使咁多，每月2千幾啦，冇之前捱得咁辛苦！」憑蘇基一夜成名，但古佬稱冇乜着數：「呢排訪問係多咗，但工作就冇多，套劇啱啱至播完，都未有劇搵我拍，會唔會轉番戲劇組？睇錢份上都係留番喺配音組好啲！」蘇基原來係個偉大爹哋。
古明華除演電視劇外，亦曾演過電影，甚至被提名角逐最佳新人獎，都算幾威！而配音工作亦不俗，聲演過不少荷里活大製作。
扮公安
星爺的《國產凌凌漆》中古佬演負責打靶的公安阿頭，係佢從影以來較多人記得角色，他說：「喺TVB時識星爺，佢叫我瘋狂啲咁做，演咗幾次就ok，好想再演佢啲戲呀！」
93年憑電影《旺角馬場》獲提名香港電影金像獎「最佳新人獎」，可惜星運依然麻麻，之後只拍過《國產凌凌漆》及《公僕II》。
配音做主角
以自由身接過多部電影的配音工作，出名揀人嚴謹的史匹堡Dreamworks都找古明華，聲演《無敵貓劍俠》主角貓，酬勞有成2萬蚊。
大茄一劇過
大茄如遇上性格突出的角色，演得好一樣有人buy！以往有唔少大茄好似蘇基咁令人留下深刻印象，不過要延續人氣就有難度，蘇基要keep住紅就要畀心機喇！
可能就快要離開香港嘅喬寶寶靠《殘酷一叮》入娛圈，搞笑形象深入民心，11年在《真相》中飾演嚴肅到暈的喬大狀令人耳目一新。
楊證樺做隊長
在《義海豪情》中飾演宮崎隊長的楊證樺，因為扮日軍似模似樣被監製李添勝大讚。
外表正氣的祝文君入行廿多年，06年在《溏心風暴》演貪錢八婆卓文玉，被鍾嘉欣演的常在心盤問到口啞啞一幕大快人心。
