娛一叮
派錢節目《撳錢》撳極唔起，now惟有搞特別版《撳錢王》豪派50萬，不設問題上限，務求造就一人獨吞獎金。周日（10日）於觀塘apm直播節目，大會更邀請一班名人嘉賓現場撳錢造勢。
見錢開眼，嘉賓之一的蘇施黃於是不停向觀眾派山埃貼士，之後更處處與now倒米，可惜捱到第18條問題連自己都答錯冇得生還。被迫留在原位繼續睇騷的阿蘇頓時火起，鬧爆：「玩到背脊骨落！」主持之一的農夫陸永見她怒火冚唔熄，索性還拖：「阿蘇開始失調！」現場火藥味極濃。
為求令《撳錢王》有noise，now在上月初發散人手搵合適藝人宣傳，佢哋睇中蘇施黃夠惹火，於是向她招手。據知一向奄尖腥悶的阿蘇，當時正被talk騷《我要賺兩億》票房不濟拖累而冇嘢撈，於是立即答應為now拍宣傳海報，更出席《撳錢王》活動。
山埃貼士捱轟
不過江山易改，周日（10日）約8時，與叔父劉天賜一同到場的阿蘇，老實不客氣向記者說：「講真吖！50萬連層樓嘅首期都俾唔到啦！我就冇諗過攞喇！」擺明倒now嘅米。阿蘇雖然把口話唔恨贏50萬，落場玩時卻出陰毒招趕走對手。第一條問題便派山埃貼士，連累五千多名觀眾出局，事後惹來網友狂轟。她除了不停用電話搵答案，更多次用手遮住顯示在熒幕上自己所揀選的答案，慌死蝕底。即使怪招百出，但她答錯第18條問題，即時玩完，由於節目屬現場直播，她無奈要留在原位。
錢冇份分，阿蘇黑面之餘更開始嚟料。到晚上11時，主持人陸永叫阿蘇向觀眾俾貼士時，她立刻關公上身，停頓數秒後爆發：「今日都玩到背脊骨落啦！你仲走嚟問我，係攞景定贈興呀？」阿蘇此話一出，全場冇人夠膽出聲。不過陸永不甘被寸，反擊說：「阿蘇開始失調！」主持人之一單立文（炮哥）亦幫口：「佢係咪受藥物影響！」火藥味濃，阿蘇一向只有佢鬧人，家陣被寸，難怪之後再有主持叫她俾貼士時，她發晦氣大嗌：「快啲啦！」明顯不滿節目時間太長。直到當晚12時半，問題去到第42條才分出勝負。事後記者問阿蘇會否覺得節目時間過長時，她又向now插多一腳，說：「預咗啦！但啲問題可以趣味性高啲！」
阿蘇唔開會
據知now原來有意邀請阿蘇出任一個全新飲食節目的主持，奈何她出名麻煩，不少製作人員更聞「蘇」色變，所以今次《撳錢王》就是阿蘇和now的試金石。
「其實之前叫過佢為《撳錢》個show開會，不過佢推得就推，最後大家只喺電話傾就算。但大家都傾得算愉快，冇諗過佢上節目就發狂。」一名工作人員說。
記者亦就邀請阿蘇主持一事問過now 101台副總裁杜之克，他說：「有合適節目的話，我哋都唔排除會搵阿蘇做嘅。（佢嗰晚好躁喎？）都係搞吓氣氛啫！」
自知天生躁底四圍辣，令她和now的合作有機會告吹，難怪阿蘇亦打定輸數說：「邊度叫我咪去邊囉！TVB搵我，我又過番去做囉！」
全城牙齒印
今年56歲的阿蘇，多年來惡人本色不改，合作完不歡而散，喺電台電視台有唔少仇家。
明顯發福的阿蘇，當晚一踩場就手指指嫌獎金奀，更說：「我連電腦都冇拎！」點知她為了獎金卻專登俾山埃貼士！
網友狂鬧
何超儀最初答應now出席活動，早前更幫手拍海報，最後卻以公事為由放飛機。另外蘇永康亦因有急事甩底，但本周一（11日）卻得閒出席TVB節目宣傳。《蘋果日報》圖片
問玩法
遊戲開始前，阿蘇不停問主持馬啟仁玩法，非常投入，似乎好想爭獎金，身旁的劉天賜反而毫無反應。
一班主持以壓軸嘉賓介紹阿蘇出場，但她一於冇面俾，講兩句就立即閃，其間阿蘇和農夫互窒，事後C君（右二）更直指阿蘇：「佢想撩交嗌！」
上網搵料
阿蘇當晚玩得投入，更經常拎電話上網搵答案，但她卻訛稱：「我打電話叫我阿媽瞓覺之嘛。」
扮唔識
有份玩的陳鍵鋒當晚曾問過阿蘇攞貼士，阿蘇卻說：「我唔識呀！」但她最後依然成功撳中答案。
當晚有份玩《撳錢》的A.Lin表示因為錯信阿蘇山埃貼士，搞到第一條就出局，她說：「我唔熟悉佢嘅為人，冇諗過佢會俾流料，諗番依家都有少少嬲。」
為錢與商台反目
《蘋果日報》圖片
上世紀已經在商台做DJ的阿蘇，有指她09年因為一個錢字，與商台傾唔掂數，跟提拔她的俞琤反面收場。
寸爆有線老細
阿蘇靠食闖出名堂，全因有線於06年請她主持《一粒鐘真人騷》，豈料她約滿後就反轉豬肚，寸爆有線執行董事徐小明，「少人睇做得好都冇意思啦。」
開天價嚇無綫
08年阿蘇自家製《蘇Good》，與TVB傾版權費時變本加厲開天殺價，還試過在節目中擲雪糕和鬧喊助手而引起投訴。
