蘇施黃（阿蘇）憑喺無線主持嘅煮食節目《蘇Good 》而人氣急升，早排播出嘅第一輯閒閒哋都有百幾萬人睇，佢仲憑呢個節目嗱埋台慶頒獎禮嘅最佳節目主持獎，無線當然食住個勢即刻播第二輯啦！外間有傳阿蘇同無線傾緊下年再製作第三輯《蘇Good 》，據聞佢同TVB 份合約講明再拍新一輯時，酬金要加唔少。阿蘇前晚上咗《蘋果》網站直播節目《娛樂開CHAT 》，接受主持人懷鈺訪問。問佢係咪會拍第三輯《蘇Good 》？佢話：「傾緊。」咁成數有幾高？阿蘇話：「唔知，因為都要喺價錢上斟酌吓，我開咗個我認為係一個好reasonable （公道）嘅價錢畀佢哋，聽聞呢個價，連陳志雲都話唔到事，佢哋真係要拎盤數計吓可唔可以afford （負擔）到。」不過佢強調續約價係一個好細數目嘅錢。
《蘇Good 》收視理想，無線即刻同阿蘇傾續約，不過自認懶惰嘅阿蘇話抖到下年3月先開工。資料圖片
主持人懷鈺（右）指阿蘇收天價拍節目，阿蘇即反指TVB 畀開賤價，佢自己開嘅只係合理價錢。
「我嘅價錢好公道」
懷鈺提到阿蘇拍第一輯前，已經傳佢用千萬天價接呢個騷，阿蘇即刻話：「因為TVB 不嬲畀開一啲叫賤價
嘛，我過啲叫做一個公道嘅價錢，就已經叫天價，我而家開嘅係相當理性嘅價錢啫，佢哋（TVB ）已經……嘩！」大家可登入《蘋果》網站http://ent.appledaily.com 隨時重溫節目。
阿蘇透露同無線傾緊新一輯《蘇Good 》嘅合作價錢，佢笑住話個價連無線高層陳志雲都話唔到事。
