我係咁！《蘋果日報》圖片
出名惡死的蘇施黃，先在有線主持飲食節目《一粒鐘真人蘇》打出名堂，再食老本過檔無線主持《蘇Good 》，人氣更上一層樓，但她的臭寸言論也變本加厲。
阿蘇早前接受雜誌訪問，講咗句：「就算冇嘢做，都未必返有線。」明踩有線觀眾唔夠無線多，即時辣興有線執行董事徐小明。
徐小明發火炮轟阿蘇偷橋、飲水唔思源，更直斥「佢人格有問題。」
對於徐小明指控，阿蘇一於闊佬懶理，還拋下一句：「我係咁㗎。」
佢人格有問題！
出名成日鬧人嘅蘇施黃，繼早前被指惡死鬧走助手Kendy ，最近更辣興前老細有線電視執行董事徐小明。事緣早前阿蘇接受《Face 》訪問時狂踩有線：「畢竟有線係收費電視，觀眾人數有限，但TVB 唔使錢，可以吸納好多唔同嘅人睇，我希望做嘅節目多人知，少人睇做得幾好都冇意思啦，就算冇嘢做，我都未必會返有線。」此話一出令徐小明忍無可忍，主動聯絡本刊，大爆阿蘇真面目。
有線《一粒鐘真人蘇》
無線《蘇Good 》
不論響有線打工（左），還是自己製作《蘇Good 》（右），阿蘇鬧人本色貫徹始終，搞到同佢做嘢嘅幕後人員都怕咗佢，索廚女Kendy 更一度劈炮唔撈。
怒插阿蘇抄橋
徐小明提起阿蘇不留情面：「東家唔打打西家係無問題，你走都唔緊要，但嗱走埋成個節目創作構思，你睇佢依家個節目抄到十足十，講句唔好聽係叫搶，做到咁仲講風涼話。
「05年我主動搵佢做一個非一般烹飪飲食節目，由節目形式到煮食形象都係我哋幫佢創造出嚟，冇有線佢今日可以咁樣走出來咩！做人唔好做到咁盡，我向來抱隱惡揚善態度，唔會唱衰人，但大家唔好只睇形象，佢人格有問題。」
借糧醫病無多謝
徐小明認為阿蘇飲水唔思源兼忘恩。05年底《一粒鐘真人蘇》成為有線電視台高收視節目之際，阿蘇因患乳癌曾向有線借糧度難關。
「有日佢忽然打返嚟話唔舒服，入唔到廠，因為佢患咗嗰個病（乳癌），我聽到好愕然，好擔心，叫佢放心休息。跟住佢就話好需要醫藥費，想向公司借幾個月糧，係六位數字。適逢之前有一個名主持問公司借糧搞到出咗問題，公司落令唔准再借，張memo 仲係我出嘅。我惟有趁同老闆吳天海去睇騷嘅時機，幫阿蘇向老闆求情。老闆聽到都好體諒，二話不說就借，等佢好番再扣糧。有線咁做都係出於對佢關懷，佢感激無句都算，估唔到今日佢會講啲咁忘恩嘅說話。」
據知阿蘇05年響有線主持烹飪飲食節目時，每集人工約2萬元，一個月主持四集，逢周六晚八時播出，一個月人工保守估計有8萬元。而佢賣俾無線嘅《蘇Good 》，除有傳每集有十多萬酬勞外，仲破天荒可以跟無線對分廣告收入。圖為《蘇Good 》開鏡儀式。
威脅無支票唔開工
病癒復工後阿蘇無知恩圖報，還擺出一副惡晒態度，徐小明愈講愈勞氣：「之後同佢續新約，但舊約仲有幾集，唔知佢係咪手頭緊，成日催嗱新約張支票，有日仲威脅我同事話今日無支票就唔入廠開工。我叫同事話俾阿蘇知，叫佢今日照入廠，如果公司未開俾佢，我以私人名義開張支票俾佢先！」
忠告好自為之
徐小明還說，阿蘇鬧人唔使本嘅態度，早在有線時代已經開始。
「自從個節目反應好，佢啲態度就開始變，成日鬧人。個節目成功係一班同事嘅功勞，唔好自己嗱晒威。佢響訪問度話無嘢做都唔返有線，我就話如果佢想返有線，就算徐小明肯網開一面，我班同事都一定集體劈炮唔撈，唔想同佢合作。」
徐小明最後忠告阿蘇好自為之。「一個人無朋友係有原因，佢份人太自大，眼中只有自己，有線同佢無仇，亦無虧欠佢，打人唔好打塊面，但佢今次咁講就係打有線塊面。佢走之前，我同佢只有工作關係，已無感情可言。一個人唔記恩，已不可相交。」
蘇施黃雖成日周圍辣火頭，但仍有班朋友對佢不離不棄，而且粒粒皆巨星，如關之琳（左）、紅姑等，已故張國榮亦是她好友。
對徐小明嘅指摘，阿蘇仍大條道理反駁方。
阿蘇：佢哋supporting 好弱
對於徐小明的指摘，發燒至102.7度的阿蘇起初在電話中不願多談，但經過記者連番追問後她才說：「黐線啦！我根本唔係咁講，我意思係大家嘅direction （路向）唔同咗。我諗法係轉做Free TV ，就會有多啲人學到煮嘢。講真，係佢趕我哋走。我哋做咗咁耐，收視都叫做OK ，但公司唔加人工，又唔提高製作費，寧願嗱啲錢去拍戲、拍劇，咁令到人好嬲嘛！」
記者追問雙方將來有沒有合作機會，她說：「我覺得難啲。（講到咁決絕？）真係難啲，其實我哋同Cable 關係向來都好好，但佢哋supporting 又弱，錢又弱，creative 又弱，佢都乾塘冇辦法。或者話係我乾塘，真係無辦法做落去。我再講多次，我唔係話冇嘢做都唔返去，只係大家路向唔同。」
至於要預支人工才肯開工，阿蘇對於自己開出這個條件直認不諱，她再說：「我不嬲都係咁，好似你哋老闆肥佬黎都係先出糧俾我，慣㗎啦！」阿蘇一如以往，死性不改。
網民睇唔過眼
《蘇Good 》受歡迎，連網友都熱烈討論，不過就唔係一面倒讚，阿蘇響早前嘅節目中鬧喊小妹妹，就有網民為小妹妹出頭狂插阿蘇。而常被阿蘇揶揄嘅肥媽，亦有網民幫佢平反。
幫小妹妹
個多星期前，阿蘇在節目中教一班小學生煎麵包，其中一位細路女因為塗牛油塗得唔合阿蘇心意，當場俾佢鬧喊。
撐肥媽講口感
《Face 》圖片
經常口出狂言嘅阿蘇，唔單止得罪有線，今年3月離開商台時，有傳她因不續約，跟舊同學俞琤反目。如今同無線合作愉快，見到陳志雲，阿蘇難得一副恭恭敬敬模樣，不過呢個蜜月期，唔知可維持幾耐？
阿蘇童年照
阿蘇起底
蘇施黃原名劉高琮，55年2月出生，現年53歲，阿蘇出生於富裕家庭，母親陳氏家族是鞋王世家，創業八十年的「步陞鞋業」是其家族生意。
阿蘇有兩兄三姊，她排行最細，家族亦有猛人，她的二哥劉高原是上市公司保華集團的副主席兼總裁，傳媒猛人劉天賜則是其堂叔。畢業於聖士提反女子中學的阿蘇，中學會考只得三分，需要重考，她的同學亦有猛人，包括商台副主席俞琤及填詞人唐書琛，78年她在俞琤引薦下加入商台，正式踏入娛樂圈。
阿蘇小時雖肥嘟嘟好可愛，不過已經學識眼厲厲，個樣寸寸貢。
《飲食男女》圖片
工作人員五大指控
阿蘇出名難服侍，早前傳佢錄影節目《蘇Good 》時經常鬧人「死蠢」，連有線昔日同阿蘇並肩作戰嘅幕後工作人員都大吐苦水，列出以下五大指控：
1非指定人選鏟你走
幕後工作人員由揸車司機，到攝影師、導演等，阿蘇均要指定人選，否則該員工必俾阿蘇兜口兜面鬧：「我以後唔要見到你呢個人，以後唔好嚟！」
2crew 車唔跟貼鬧爆
出外景只坐私人座駕嘅阿蘇，規定crew 車一定要跟貼佢，不能落後兩架車位，但亦切忌在她前面，否則阿蘇粗口侍候落車鬧爆。
3入屋唔准停響客廳
有段時間，因阿蘇租出自家廚房拍攝，但規定一眾工作人員登堂入室後要隨即跟她入廚房，不能停留客廳半步。有次一位收音師不小心留了一工具箱在客廳，阿蘇知悉後即大發雷霆，走出廳鬧足半個鐘，已入廚房嘅工作人員就嚇到唔敢出嚟。
4唔准食香口膠
話說有個幕後工作人員食住香口膠開工，佢發現後即刻停拍，走埋個同事度狂鬧：「我最憎人食香口膠，xyz ……」仲勒令要即刻吐咗佢。
5試食不能有異見
阿蘇每次去食店試食評分後，鏡頭下都會叫啲工作人員試埋一份俾意見，但當聽到有同佢意見不一時，佢就會鬧人「垃圾口」。
《壹本便利》圖片
三個人頂得住
密友金燕玲一物治一物
雖然阿蘇響好多人眼中又惡又寸，但總有可以將佢馴服嘅人，呢個就係密友金燕玲（右）。據知有次阿蘇帶埋金燕玲出埠工作，佢每次出聲都俾金燕玲兜口兜面窒到應，窒到阿蘇無聲出，令旁人甚驚訝，真係惡人自有惡人磨。
拍檔泰山喊完再努力
由商台合作至今，能夠成為阿蘇拍檔八年之久嘅泰山，究竟有咩能耐頂得住？泰山：「當初合作頭三個月，都被師父阿蘇鬧到喊，匿響屋企喊嗰陣仲有閃過一刻唔撈，不過因我太鍾意做電台，加上好多人都話我跟到個好師父，所以我至唔放棄，要用另一個角度諗：『佢唔關心你，鬧你都曬時間！』就可以頂得住。其實跟師父做嘢，最緊要留心聽，尊重佢，反應快，響佢開聲之前，你就要做定，響佢咁樣訓練下，我都醒目咗。」
助手湯展維以柔制剛
阿蘇新助手是無線前藝員湯展維，佢曾響《法證先鋒》做大茄，轉為阿蘇助手後亦響新一輯《蘇Good 》有份出鏡試食。據知佢脾氣好，說話又陰聲細聲好溫柔，用以柔制剛方法成功服侍阿蘇。記者致電問佢同阿蘇嘅相處之道，但佢就話未問過老闆唔可以答。果然夠聽話！
