我係靠個樣搵食！(真實對白)
上週三，阿蘇出席沙田馬場騷，席間本刊向阿蘇求證「換皮」一事，佢亦大方承認自己有做「Thermage 」。不過阿蘇忘形得滯出現四下巴，要保養得好，咪笑咁誇呀！
蘇施黃（阿蘇）嘅《蘇Good 》前週六（10 日）第2 輯埋單，收視平均19 點。《蘇》更試過最高30 點收視，無線見好唔收儲定彈藥，於農曆年更會播出一連10 集，由阿蘇一早包拍兼主持嘅《SO FAR 蘇GOOD 》賀歲。
長做長有，快53 歲阿蘇當然要趁空執掂副偈見人，據知阿蘇最近接受了一種名為「電熱射頻緊膚」（Thermage ）嘅療程，手術後阿蘇塊面紅卜卜，又緊又嫩滑，後生唔少。Man 爆蘇施黃原來咁貪靚，更對記者直認：「我係靠個樣搵食！」
快53 歲嘅阿蘇鬧人唔畀面，不過勝在夠坦白，曾在訪問自認「lonely boy 」，前週六在《蘇Good 》內又話自己「唔男唔女」，不過呢位敢言TB 一樣姿整，女人過女人。
執靚見人
阿蘇07 年割完大眼袋，最近又密密執靚個樣，據知她剛完成了一個近幾年於名媛界興起、名為「電熱射頻緊膚」（Thermage ）嘅手術，目的係收緊面頰兩側下垂嘅皮膚。「最近阿蘇都同人講話自己做咗換皮啦！」知情者說。
05 年阿蘇患上乳癌，手術後，慢慢與相識多年、兩度失婚回港拍劇嘅金燕玲發展出同性密友情。
靠樣搵食
再次「動工」，原來阿蘇同無線傾掂數，《蘇》第三輯正式落實開拍，不過有冇新構思同收幾錢，阿蘇向本刊呻：「第三輯係拍㗎喇，不過內容未諗喎！你有冇好提議啊？（係咪畀到你所講嘅天價？）無線好刻薄㗎！總之我抵到爛啦！俾你知道個天價真係笑死！」自稱靠樣搵食嘅阿蘇亦好緊張自己個「靚樣」，她在上週三（14 日）先向本刊記者承認「換皮」，仲好肉緊：「三萬蚊一次㗎！你後生就唔使啫，我50 幾歲靠樣搵食梗要keep 㗎啦！」到了週日（18 曰），本刊再次追問阿蘇「Thermage 」換皮，她大方分享晒成個過程。
F ：《FACE 》蘇：阿蘇
F ：阿蘇，你響邊度做「Thermage 」㗎？
蘇：唔講！
F ：聽講好似俾煙頭辣咁痛喎？
蘇：係！你形容得好啱！用碌嘢不停咁噴啲氣出嚟，碌響你塊面度，「噓噓」聲好恐怖！
F ：會痛好耐㗎？
蘇：痛一下囉！之後都唔係點痛！
F ：一個星期做幾多次？
蘇：又唔使咁密！係一年做幾次啫！
F ：咁你仲有冇試其他嘢？
蘇：有呀！最近響台灣買咗隻「我的美麗日記」（台灣近年至hit 面膜），而家敷吓睇吓點囉！
又敢做敢認，阿蘇抵讚！
8 月︰緊膚前泡泡面
未做「Thermage 」前，阿蘇雙頰未呈現泛紅現狀。設計圖片
1 月︰緊膚後紅嫩晒
阿蘇做完「Thermage 」，雙頰即時紅卜卜，本刊記者見到佢面頰上的微絲血管出現輕微爆裂情況，但頸和面皮明顯緊致咗。
「Thermage 」係乜？
美容網頁內，「Thermage 」（電熱射頻緊膚）聲稱是強調唯一可以單次治療即達到肌膚緊致，主要是將高效射頻熱能量推入皮下2.5 毫米或更深處，療程約1 小時，可用於拉面皮、眼底細紋、改善雙下巴、收緊鬆弛肚皮、手臂及膝蓋的無創療程，治療後可以立即回復日常生活，手術毋須開刀，但要由專科醫生主理。
似俾煙頭辣
醫學上將疼痛分為十級，一至三級為輕微疼痛，四至六級為中度疼痛，七至十級為重度疼痛，阿蘇呢個緊膚手術，有名媛用家向本刊親述，做這療程時面部感覺好似煙頭辣咁，3 級痛啫原來！不過據知若要保持效果要長期密密做，為咗靚，阿蘇頂住呀！
著名皮膚科醫生史泰祖
「Thermage 」唔係一次得，要做好多次，佢嘅原理係用電力刺激皮膚，做嗰陣會好痛，之後會紅，不過唔會爛，係好輕度，我個人唔相信，所以我唔會同我嘅client 做，同類似我會建議做激光！
名媛用家
而家好多闊太做「Thermage 」啦，好多都係搵陳衍里（著名本地皮膚科專科醫生）做，佢係用啲嘢掂落塊面，做嗰陣就會好似俾煙頭辣咁痛囉！做完之後會即時見效，不過兩個星期度就會好快打回原形，要keep 住做先得！有啲女人怕痛，會用麻醉藥囉！
高清妝
化妝千祈唔好講嘢，唔係啲粉就會入晒你啲紋，個妝就會裂開同埋見到你好老啲紋。
玩電髮
電完之後，個頭好鬈，gel 咗之後gel 得唔好，佢鬈埋一舊，點解會咁？
佢問我電髮好唔好，我梗係覺得唔好！
叮眼袋︰前
06 年阿蘇仲響有線主持《一粒鐘真人騷》，啱啱戰勝乳癌嘅阿蘇雖然瘦晒，但個肥眼袋仍然嚇死人。
後
在第二輯《蘇Good 》中，阿蘇於節目中表示自己有割眼袋，又強調割眼袋唔係整容，只係改良自己。
貪靚TB 蘇
阿蘇最後一集《蘇Good 》中搵嚟同自己化妝嘅名牌化妝師Rick Chin 同負責set 頭嘅Herman Law （ii HAIR NAIL SPA ）做嘉賓，真係睇唔出外表鬼咁man 嘅阿蘇原來咁貪靚。
