由書展橫跨動漫，22歲毒男鄭智殷外表行為騎呢，網友勁笑佢射喱兼傻仔。
但其實鄭智殷因為3歲起發現患上腦水腫，開過7次腦徘徊鬼門關，人生更充滿積極：「細個時爸爸發覺我比同年嘅小朋友行動遲鈍帶我睇醫生，醫生發現我有腦水腫，由3歲到14歲做咗7次腦手術，所以導緻眼球肌肉唔受控制先會射喱，希望大家唔好介意，但我從來都唔怕死，享受人生每分每秒，我知好多人都笑我傻仔話我騎呢，大家開心就得喇，我目標係想做大家嘅開心果啫！」
一向係周秀娜同李蘊死硬fans嘅鄭智殷，上週五（30日）又一早走去酒店等Donut：「我好欣賞又靚又努力嘅人。」氹到班Donut好開心。
自小鄭智殷都得到做護士嘅爸爸同教跳舞嘅媽咪悉心照顧，佢話：「每日出門都會錫大家塊面同攬攬，我叫阿爸做寶貝daddy，佢又會叫我寶貝乖仔，父母喺我心目中靚過所有o靚模。」
成頭刀疤
3至14歲期間開過7次腦，頭部疤痕多達10處。
關嘉美：有生命危險
好似鄭智殷咁腦部要裝壓力分流器嘅病人，有部分都要坐輪椅或臥床甚至乎失控要長期用尿片，覺得佢同其他病人相比，智商有番咁上下，但佢要小心分流器會受感染導緻腦部發炎，到時可能會有生命危險。
