林峯踏入30歲即行運一條龍，虎年正式成為歌、影、視三棲藝人，09年他無論港紙人仔都搵個盤滿缽滿，豐收過後送牛迎虎，今年派利是加碼至六位數字，林峯捱更抵夜搵銀，從而體會健康可貴，趁今天人日，他祝願廣大讀者虎虎生威，身壯力健。
在芸芸無綫力捧的藝人中，林峯創下成功先河，在公司多元化發展打造下，由電視圈轉戰樂壇，推出唱片成績不俗，無綫乘勢將林峯再推上大銀幕，替他接了兩套電影，夥拍前輩蔡卓妍（阿Sa）和楊千嬅，林峯笑說：「虎年首要重新學做電影人，我10年冇同千嬅合作，阿Sa就電影上未合作過。」
去年底林峯30歲生日後，可謂行運一條龍，除了在香港甚受o靚妹仔歡迎外，在內地也一樣吃香，北上搵人民幣數目非同小可，還奪得無綫的亞太區最受歡迎香港男歌星獎。
林峯說：「今年希望時間可以分配得好啲，入咗行10年，09年係我最豐收嘅，無論金錢同名利都係，因為推出唱片，反而多咗時間搵外快，之後有機會推出國語專輯，以歌星身份打入大中華。」由於事業和收入都大躍進，為了回饋身邊人，林峯決定加碼以六位數字派利是，寓意派得多搵得多。
雖然貴為富家子弟，但林峯近年賺得的金錢都交給父母代為投資，他說：「我賺到嘅錢都畀爸爸買樓投資，因為我唔識，以我所知係有斬獲。為咗慶祝新年，我都用五位數字請爸爸媽媽食咗餐豐足嘅鮑參翅肚。」
