林峯和陳芷菁前晚同樣出席賑災騷，昨日兩人為無綫新劇開鏡時不約而同表示患腸胃炎，又屙又嘔，林峯要急看醫生打針止屙，而陳芷菁更自爆在台上肚痛險些按捺不住出醜，但他們強調和賑災騷提供的食物無關，陳芷菁更透露劉德華和她食了同一件三文治，不過華仔卻沒有感到不適。
無綫新劇《談情說案》昨日在將軍澳電視廣播城開鏡拜神，一眾演員林峯、楊怡、馬國明、廖碧兒和陳芷菁等一同出席，身為男主角的林峯卻姍姍來遲，原來他腸胃炎又屙又嘔，因此要看醫生才稍遲出現，同場的陳芷菁也患腸胃炎。由於兩人都參加前日的《8.8水災關愛行動》賑災騷，不過他們均表示和大會提供的食物無關。
陳芷菁自爆因腸胃炎而肚屙，前晚在台上險些按捺不住而出醜。
屙到虛脫早退陳芷菁表示前日賑災騷早上，買碎蛋沙律三文治醫肚，她說：「我分咗半份畀華仔食，之後到傍晚開始肚屙唔舒服，華仔當時都問我乜嘢事，佢聽到我話唔舒服仲話佢都有食喎，我一陣會打畀佢問佢有冇事，我真係屙到有啲虛脫，結果10點幾頂唔住要提早走，場內我屙咗近5次，喺台上訪問Eason（陳奕迅）時真係差啲瀨。」結果由前晚到昨早陳芷菁都不敢食東西，只是飲水，她自稱瘦了兩公斤，陳芷菁表示：「好彩老公細佬係醫生，又住得近，佢畀啲止屙藥我食，家好番啲。」與陳芷菁食同一份三文治的華仔，昨日經助手回覆表示身體未有任何不適。林峯則說：「我冇食場館啲嘢，大會啲食物我都冇食，但係噚日下晝開始肚屙，我仲以為冇事，點知做完晒返屋企就作嘔，今朝頂唔順去睇醫生，要打針止屙。」昨晚林峯為演唱會DVD舉行祝捷會，他表示自己未能盡興狂食。
