何韻詩自誇o靚模始祖

何韻詩將於10月9至11日在紅館舉行一連三場《Supergoo》演唱會，門票已於昨日率先在東亞銀行優先訂購，其實早前阿詩已為個唱拍攝海報，她更罕有地穿上短裙和6吋高踭鞋，為了個唱不惜一改以往男仔頭的形象，更即時被取笑要和o靚模爭飯食，她即誇口說：「我係o靚模嘅始祖，當年我唱小丸子時都已經係長長秀髮，都唔知幾有女人味，我係goo模就真，而且我嘅身材都唔夠o靚模撼，費事獻醜。」

怪相嚇壞契女
阿詩為求效果，更花了足足6小時駁長頭髮，令她要邊瞓覺邊駁髮。拍攝當日阿詩亦得到契女楊靖探班，當時阿詩急急腳衝入更衣室，嚇得現場工作人員以為阿詩有不滿，最後她自爆因高踭鞋令她苦不堪言，所以要稍作休息，事實上阿詩的一身奇特造型已嚇得契女不敢埋身。