曾公開宣佈「出櫃」的同志歌手何韻詩，打扮雖然中性，竟難逃遇到鹹濕佬施襲的恐怖經歷！
早前阿詩孖教徒高皓正到愛爾蘭，為ViuTV拍完《跟住矛盾去旅行》節目後，阿詩獨個兒跑到北歐流浪一個月，為慳錢捨酒店住民宿，怎知卻在芬蘭遇上鹹濕屋主，上月31日她在facebook自爆：「芬蘭恐怖住宿驚魂夜，嚇到我呢，好在我事發時夠鎮定，安全逃脫，最終個人冇穿冇爛。」
早前阿詩與高皓正在愛爾蘭為ViuTV拍《跟住矛盾去旅行》，之後便去流浪。資料圖片
阿詩上月底在fb自爆在芬蘭入住恐怖公寓，更要連夜走佬逃亡。
否認半裸逃亡
事隔三日，阿詩在fb驚爆原來遇到鹹濕屋主：「但到芬蘭rovaniemi竟然上演入住恐怖公寓，遇上鹹濕屋主要上演午夜冰海逃亡。」嚇到粉絲紛紛留言：「雖然你好靚仔，但你真身始終都係個索女，請不要過份相信人性的美好面，獨自去些人少又陌生的地方，這樣會很令人擔心的！」阿詩回覆：「冇錯，經歷咗呢次恐怖公寓後，我終於接受我真係一個靚女呢個事實。」
由於最終阿詩安全無事，網友安心之餘亦藉銅鑼灣書店事件笑謂：「安全返嚟大家就放心，千祈唔好用咗自己方式唔知去咗邊。」阿詩自嘲：「呢勻真係用自己方式冰上逃亡。」網友又問鹹濕屋主有幾鹹濕？阿詩回覆：「好很恐怖的。」
有雜誌爆男屋主在半夜闖入房，成身酒味向阿詩霸王硬上弓，阿詩反抗時被扯爛衫露bra，拼盡命推屋主出房後，阿詩驚到即刻執行李擒窗速逃，上演一場半裸逃亡記云云。昨日本報向阿詩求證，她回覆：「因為呢啲係虛構情節，所以唔回應，冇施暴冇半裸逃亡，好機智咁逃離間屋，雜誌求其搵一張相話係鹹濕佬，有啲嘢太誇張，好多都係假，唔係事實唔回應。」
採訪：皓騫
from:
http://hk.apple.nextmedia ... 160422/19580803
