現年50歲的林敏驄早前和07年港姐冠軍張嘉兒傳出緋聞，雖然兩人都否認拍拖，但前晚林敏驄風騷現身杜麗莎的音樂會時，公開力撐張嘉兒並非「豬扒港姐」，還指今屆候選港姐佳麗是「雜扒」，寸今屆佳麗的質素麻麻。
杜麗莎前晚在尖沙嘴舉行音樂會，並同時預祝其父Fernando Carpio 77歲生日，杜麗莎與父親和大女三代同堂在台上jam歌，更吸引林敏驄、徒弟傅穎和鄭融等往捧場。
「佢好過今屆好多」
今屆候選港姐質素認真麻麻，即使穿上泳裝也顯得平平無奇。資料圖片
由於近日林敏驄和07年港姐冠軍張嘉兒傳出緋聞，所以他出現時即被追訪。林敏驄接受訪問時繼續否認和張嘉兒拍拖，他說：「利嘉兒呀？邊有影到相呀，發展唔到又老屈，都冇見過面，係將啲相兩個砌埋一齊，我同佢都唔熟。」記者笑指兩人年齡差距20多年，並指他唔熟唔食，林敏驄即發揮其搞笑本色說：「唔介意，十幾廿歲先興奮同有新鮮感，但係豬扒要熟，其實咁樣話我冇所謂，但話人係豬扒就唔好，佢唔係豬扒，佢係港姐，佢好過今屆好多，如果佢係豬扒，今屆係乜？雜扒乜都有。」
林敏驄雖力撐張嘉兒，但強調無追求之意，更笑言不要令他變成「扒房」，他還表示現時感情生活一片灰白，間中只是多了一點蛋白罷了。
