六叔邵逸夫的乖孫最近開設高檔法國餐廳，六嬸方逸華當然戮力撐場，昨親率無線一眾花旦小生包括廖碧兒和鄭嘉穎等出席餐廳開幕儀式，眾星乘勢攝位傍實六嬸及樂易玲，但馬德鐘相當命苦，慘被街坊揶揄是鹹豬手。
六嬸方逸華昨親率無線大軍，與高層陳志雲、樂易玲及一眾小生花旦包括鄭嘉穎、林保怡、鄧健泓、謝天華、馬德鐘、廖碧兒、蒙嘉慧和張嘉兒等，出席位於灣仔的法國餐廳Cepage 開幕儀式，吸引大批街坊圍觀湊熱鬧。據悉該餐廳其中一位老闆是六叔乖孫，雖然六叔昨未有現身，但由六嬸率藝員撐場，其間眾無線親生仔女傍實樂易玲飲香檳，又爭相跟六嬸傾偈，當中又以林保怡和謝天華冧得六嬸最掂。
蒙嘉慧、張嘉兒和蕭正楠等，昨日在餐廳內傍實樂易玲。
六叔乖孫有份投資的餐廳昨舉行開幕儀式，六嬸親率陳志雲、樂易玲及一眾小生花旦撐場。
六嬸嚇一跳
近日被兩宗鹹豬手事件拖落水的馬德鐘大抵飢腸轆轆，全程站在一條大火腿前虎視眈眈，但因不欲食相曝光，只偶然伸出閃電手以牙籤拮少許火腿品嚐，可是店外的街坊吹水時卻以馬德鐘作笑柄，一名阿伯先大叫：「嘩！鹹豬手喺入面！」另一街坊八卦問：「邊個呀？」阿伯即笑指依偎火腿旁的馬德鐘：「過隻咪鹹豬手咋！」其實阿伯是指火腿，搞爛gag 。隨後店內響起巨大鑼鼓聲準備舞獅，六嬸即被嚇一跳，林保怡和謝天華更各自掩耳離開，倒是六嬸內力深厚頂得住，她與樂易玲挽手離開時，被問到為何不試菜？六嬸笑說：「我成日都會嚟，大把時間啦。」陳志雲則說：「我哋唔係嚟試菜，到一到恭喜吓啫。」此外，徐淑敏（Suki ）昨駕車路經店外，乍遇記者竟問：「你哋跟咗我好耐喇？」記者表示是採訪餐廳開幕，並問她是否獲邀出席？瘀爆的Suki 說：「冇喎，唔關我事。」採訪、攝影：娛樂突發組
馬德鐘對眼前火腿虎視眈眈，結果被街坊戲說是鹹豬手。
http://appledaily.atnext. ... art_id=12222983
