經常拍拖外遊被斷正的蕭正楠和黃翠如，前晚外遊完東京返港又撞正一眾等候韓星的傳媒，雖然早前有傳吳若希介入令「翠蕭戀」現危機，但似乎緋聞未有影響戀情。
笑住開車走
單拖戴帽和黑超的蕭正楠，前晚在接機大堂被記者發現，邊行邊尷尬地表示趕去停車場取車，問到女友翠如呢？他說：「搞緊行李，因為大家分工。」接著他表示曾兩人有假期到東京濕平，又說：「今次旅程好開心，因為好耐冇唞，亦好耐冇去過旅行，𠵱家叉足曬電！」他亦否認因有緋聞而要安撫女友，強調只不過因為拍劇後想放假休息。
大約過了十五分鐘左右，叉爆電的黃翠如獨自推三篋行李步出機場，直言今次行程十分開心的翠如，被問到有傳蕭正楠此行是旅行箍煲？翠如笑說：「呢個（傳聞）太搞笑喇，你唔講我都唔記得。」再問旅程是否爽爆？她甜笑說：「其實都只係休息。」同時有傳翠如遭高層打壓，傳她在本月中舉行的台慶頒獎禮上，即使有三個半提名亦沒有獎？她說：「視後完全唔會諗，其實有份坐都已經OK！」後來蕭正楠折返並替女友推行李，再到停車場開車走。
黃翠如等男友安頓行李後，便揸車離去。
吳若希與緋聞男友蕭正楠前後腳到日本。互聯網圖片
吳若希抵日
這邊廂翠蕭由日本返港，那邊廂吳若希前晚亦啟程到日本拍攝，實在不知是湊巧抑或無緣。
此外，翠如昨日在銅鑼灣出席活動，她再三否認旅行箍煲，並恩愛地說：「冇乜所謂，娛樂新聞都係大家開心，我哋未試過唔好心情對住大家，從來都冇嘈過。」雖然翠如近日不在香港，但仍有留意佔中運動，她說：「我都有為香港祈禱，𠵱家香港係好難過，希望大家都會一條心，希望香港好。」
採訪、攝影：藍文浩、盧妹
from:
http://hk.apple.nextmedia ... 141203/18955511
