英皇一班歌手林峯、泳兒、鍾舒漫、王祖藍、陳偉霆同張致恆噚日浩浩蕩蕩咁喺旺角一間唱片舖，為佢哋隻新春大碟做宣傳同搞簽名會。年近歲晚，仲要喺旺角呢啲人來人往嘅地方做簽名會，就梗係搞到條街水洩不通。
右起：林峯、泳兒、鍾舒漫、陳偉霆同王祖藍個個都忙住幫fans 簽名。
陳偉霆同各位柏檔落力谷新碟，佢話新年應該會去女友Angelababy 屋企拜年。
「食咗藥渾渾沌沌」
呢張唱片海報仲有蔡卓妍（阿Sa ），不過噚日就唔見佢，連個MV 入邊阿Sa 只係出咗幾個鏡頭，阿Sa 呢排都唔喺香港，所以幫唔到手做宣傳，泳兒同鍾舒漫就話因為阿Sa 只係負責rap ，幫佢哋點綴吓。成班人一齊唱歌拍MV 梗係會有笑料，泳兒就踢爆拍MV 時，林峯就狂甩嘴，泳兒都有同佢兜番話：「不過林峯過日因為腸胃炎，唔舒服，所以狀態唔好啫。」之後問番林峯，佢起初唔認仲話：「邊有呀，個個都有甩嘴。」之後話佢因為腸胃炎先搞成咁，佢至肯認：「係呀，過日真係唔舒服，食咗啲藥渾渾沌沌咁。」另外，陳偉霆嘅女友Angelababy 話會去佢屋企拜年，問佢會唔會去番人哋屋企拜年？陳偉霆話：「睇情況啦，應該都會嘅，睇吓有冇利是嗱，都會帶我自製嘅蘿蔔糕去孝敬世伯同伯母。」都算佢有心。
林峯到場就立即雙手合十，莫非祈求新碟賣個滿堂紅？
from
http://appledaily.atnext. ... art_id=12129227
