農曆年初三沙田會舉行「農曆新年賽馬日」，汪明荃（阿姐）、林峯同麥玲玲會擔任表演嘉賓，噚日佢哋喺跑馬地馬場宣傳，現場仲有四名見習騎師，點知佢哋一見到林峯就變成小fans ，要求合照之餘仲大膽索吻。
林峯（右二）同見習騎師合照，其中楊明綸（右一）係佢嘅fans ，身旁嘅好友仲口多多幫楊明綸向林峯索吻。
汪明荃噚日宣傳「農曆新年賽馬日」，當然唔少得同啲馬仔合照留念。
樂小姐成貴人
其中一名見習男騎師楊明綸自覺有幾分似林峯，所以想影合照，大家影到笑笑口之際，同場楊明綸嘅見習騎師好友就問：「佢可唔可以錫你面珠！」林峯好尷尬話：「唔好喇，我呢排冇乜緋聞，唔好搞呢啲咁嘅嘢。」馮仁昭相信若果係靚女要求，林峯一定即刻接受。之後問林峯係咪同女仔傳緋聞會好啲，佢話：「咁正常啲咋，真係新年嚇一跳，不過只要係支持我都感激，乜人都歡迎，買我CD 就來者不拒。」呢個時候麥玲玲又嚟打招呼，仲公開指點迷津：「今年有木嘅人都利你，姓樂、林、李都係，你會繼續成為樂小姐喜愛嘅人，冇拍拖會變有，有就會分。」林峯聽到好緊張話：「唔係呱。」麥玲玲乘勢話佢即係有拖拍緊啦，搞到林峯無從招架，兼且一頭汗。阿姐就獲贈足金馬蹄鐵，佢主動問啲記者等到周慧敏同倪震未，話睇過佢哋嘅結婚相，覺得好溫馨。記者問阿姐點睇章子怡同男友嘅天體浴相，佢話：「佢哋自己玩啫，冇乜唔妥，又冇影響到人，可能佢男友係鬼佬，但身為公眾人物都要小心。」
麥玲玲批林峯而家若有拍拖，出年就會分手收場，搞到林峯鬼咁驚。
from
http://appledaily.atnext. ... art_id=12062506
