09年第一個交易日，係時候講吓金手指篤過嘅「一注獨贏」貼士08年表現。可以用24個字做總結──「叫沽匯豐，好快到價；油價波動，油股好弱；白銀戰隊，逃兵處處」。以下就係我對啲貼士喺09年嘅展望。
匯豐今年好難搞
匯豐（005）：07年中，孫柏文建議沽匯豐，仲提供112.5元呢個目標價。當時匯豐賣140元一股，結果喺08年1月尾已到價。真係好似成個世紀前嘅事。之後會點？匯豐會面對好多被政府瘋狂補貼嘅對手，難搞。中油香港（135）：應該係我最敗筆嘅貼士。07年10月25日叫買，過日開市價5.9元一股，最高6.7元，成億股成交量。原先目標價？8.05元。08年收市價？2.41元。敗筆。中油香港我冇放過。不過如果要去到8.05元，就要有好多嘢發生先得。例如，中油手上有好多現金，佢哋要趁油價低時，買啲開採成本高到阿媽中石油（857）都唔要嘅油田，跟住等油價翻身，盈利同股價就可以暴升。還看中油嘅未來部署。
白銀維持原建議
白銀：作為白銀戰隊隊長，當然對白銀不離不棄。06年貼過日，銀價10美元一盎斯，08年3月見過21.44美元，08年10月就跌到8.4美元。「印銀紙」已成定局，買定白銀等睇戲。維持原本建議：強力買入。目標價：120美元一盎斯。有效期至：2016年3月6日。（編按：筆者遠遊，下周開始《金手指》專欄暫停。）孫柏文http://phatdat.blogspot.com
from
http://appledaily.atnext. ... art_id=12040444
