欣宜話揀零食除咗要健康，仲要食得飽，她說：「我哋減肥嘅人，最緊要計食得抵唔抵！」
藝人經常外景接廠景，等埋位百無聊賴，通常都有包零食傍吓身。講到零食，令人又愛又恨，有邊個真係天生麗質食極唔肥啊？要食得健康又可以過口癮，就要食得醒目，因為市面上標榜低卡低糖零食，其實陷阱重重，點揀？不如由身經百戰的欣宜醒你幾招！
欣宜推介$46（City'super ）
脂肪唔過3g
之前積極減肥的欣宜，由營養師教落一套計脂肪方法，提到零食，主攻健康食品的她，說個不停︰「係營養師教我睇fat 嘅，其實唔煩㗎，只要望吓零食後面嘅成分，如果fat contain 係3g 以下，就符合健康標準。」
欣宜話媽咪生前成日買藍莓俾佢食，話可以補眼，佢推介呢隻藍莓條，好味又唔肥，每包fat 得2.9g ，啱晒標準。
$31（City'super ）
睇成分排位
除了計脂肪，欣宜話成分排位亦好重要，要食得安心，望埋成分就冇走雞，「如果唔鍾意計嚟計去，簡單啲可以睇佢個ingredient （成分）排嘅次序，包含最多嘅就會排頭，如此類推。如果啲sugar 擺到好尾，即係算少喇！」
欣宜解釋這包蘋果片的糖漿（corn syrup ）排在較前的位置，即表示糖分亦較高，不宜多吃。
$29（City'super ）
粟米片代薯片
欣宜說：「基本上，所有薯片都唔合格，係減肥大忌。我建議用栗米片代替，因為口感好似薯片，又不經油炸，不過要留意栗米都係澱粉質，而且鹽分比較高。另外唔可以只睇total fat ，要睇埋全包分咗幾多份，例如呢包雖然寫住6g fat ，但係全包有成8份（serving ），即係你食晒成包已經有48g fat 。」
$8（New World Mart ）
地址：尖沙嘴金巴利街5號地下
衛蘭養顏米漿
衛蘭自從做咗纖體代言人後，已經戒咗零食，佢推介一隻健康又唔肥嘅韓國米漿水。
「有時早餐都會飲，因為佢用米製成會飽肚啲，咁就唔怕肚空空周圍搵嘢食。米漿係媽咪教我飲㗎，佢話飲咗皮膚會又白又滑。尖沙嘴有條街專賣韓國嘢，可以好方便買到。」
王喜山渣餅消滯
我鍾意嘅零食係啲古老嘢，好似山渣餅、花生糖同麥芽糖餅，花生糖我會揀嗰啲用古老方法人手搓嘅，好食好多。而山渣餅酸酸甜甜入口溶化好鬼正，除咗睇中醫送藥，我平時都會買嚟食，試過一日食晒成包！（$3有10小包）
黃德斌黑朱古力保心臟
身形fit 爆的黃德斌，非常注重健康，揀零食亦以有益為主，「其實我咩零食都啱，好似薯片咪食兩塊，最緊要唔好過量！不過近排我比較鍾意食瑞士蓮99%可可嗰隻Dark 朱古力（$35.9Market Place ）。一來冇咁甜，二來好多報道都話黑朱古力可保護心臟同預防癌症，食咗人都開心啲！」
$12（City'super ）
楊思琦愛嗒果肉啫喱
嬌滴滴的楊思琦，亦是零食愛好者，由於食極唔肥，所以從冇戒口，而晶瑩剔透的果肉啫喱，就令佢瘋狂：「滑嘟嘟嘅啫喱同蒟蒻我都一樣咁鍾意，當然有果肉嘅啫喱仲好，感覺好清新。之前都試過自己整，不過依家好多超級市場種類好多，買都好方便，連我最鍾意嘅提子都有，仲係啖啖肉，連提子皮都去埋。」
化妝：Synni@PRIVATE i
髮型：Ben@IL COLPO （楊思琦）
$23.5有12小包（City'super ）
蒟蒻要細啖食
思琦說：「除咗啫喱，我都成日食蒟蒻，感覺好似仲健康，因為佢高纖維對腸胃好有益。最近我搵到呢種細細粒獨立包裝嘅藍蒟蒻，果味超濃郁。以前心形大粒嗰隻蒟蒻，我都好鍾意食㗎，但因為蒟蒻質地煙韌又滑，食嗰陣如果唔小心，好容易啃親，所以細細啖食就最安全喇！」
眼鏡朱古力$3
地址：土瓜灣九龍城道66號A 地下
懷舊眼鏡朱古力
楊思琦亦好鍾意食懷舊糖仔，好似眼鏡朱古力同可樂糖，佢嘅座駕亦擺了一堆：「最經典都係眼鏡朱古力，記得我細個返學成日食㗎，後來士多執晒，超市亦唔見有得賣，點知俾我無意中發現土瓜灣一間舖頭有得賣，一得閒就會去入貨，拍劇悶悶哋嗱嚟食都幾好㗎。」
$14.9（TASTE ）
陳豪鮮味芒果乾
提到零食，陳豪兩眼發光，「我拍劇只有咖啡係全天候，零食就放響屋企。其實好多種零食我都鍾意喎。齋燒鵝、雪糕、馬仔、士多啤梨味四方果啫喱同蒟蒻等。
他更戮力推介至愛芒果乾：「呢隻7D 芒果乾，係普通supermarket 都買到。佢唔係太甜，芒果肉乾身得嚟又唔會太乾，果味好濃，食唔停口！」
薛凱琪朱古力精
薛凱琪鍾情朱古力，任何朱古力味零食都唔放過，「朱古力我最鍾意Ｍilk 同埋Truffle ，總之係朱古力味就得，曲奇餅、薯片、百力滋呀。食朱古力令人好有energy ，又開心。仲有牛仔片我都鍾意，雖然以前一片片好食過依家一格格，不過一次食3包都得。」
黃伊汶辣香口膠開聲
做歌手最緊要保住靚聲，黃伊汶就推介食辣香口膠：「香口膠愈辣愈好，可以清吓喉嚨，方便開聲，唱歌之前一定要食一粒！」講到其他零食，她自稱似足韓國人，「屋企一定會有紫菜，因為我全家都鍾意食，無論食飯、食麵都會加落去。」
