近年提起葉澍堃，想到的已非他的前高官身份，而是退休後四出搵食，寫食評、寫專欄兼做飲食節目，食家身份深入民心。經常周遊列國食好嘢，身形卻未有暴脹，原來他有一套健康飲食之法，清淡少鹽為其原則，「其實唔關食乜嘢地方嘅菜式事，中餐、西餐都有濃味嘢，係睇食嗰個點去揀」，例如中菜他少食濃味肥膩的「燜嘢」，又參考長壽之鄉居民的多菜少肉的五低飲食習慣。記者：嚴敏慧
葉澍堃給人印象當然是識飲識食，但原來過去多年，他的飲食習慣也有重大改變。他接受訪問時透露，不論自己煮或是外出用膳，年輕時喜歡食肉，兼要求濃味，更愛煎炒香口的餸菜，但隨著年紀越大，為了健康著想，已轉向清淡飲食為主，奉行多菜少肉，「清淡啲，政府都推廣少糖少鹽，唔好樣樣都加鹽加醋」。
慢食七分飽 少飲酒
葉稱，內地以長壽聞名的廣西巴馬，當地人的飲食就是以粟米、野菜等為主，較少吃肉，相信長久多菜少肉，對健康長壽有一定幫助。位於廣西中部的巴馬有世界長壽之鄉的美譽，日本國際自然醫學會代表曾到當地考察，認為除當地天然環境佳，巴馬人飲食模式亦為長壽關鍵。有學者則分析指，當地人飲食其實包含五低，低熱量、低脂肪、低動物蛋白、低糖和低鹽。
經常周遊列國食好嘢，究竟哪個國家的菜餚最健康？葉指，其實沒有所謂最健康的菜式，因為餸菜健康與否，非視乎來自甚麼國家或地方，而是自己的選擇，「乜嘢國家嘅菜式都可以有煎炸嘢，睇你個人取捨，叫乜嘢食」。但他發現最近餐廳愛用松露油烹調，令食物帶有松露香，而他卻不甚喜歡，「原汁原味最好食，唔使太花巧，最重要食材新鮮天然，清淡就好」。
中菜一向較為濃味油膩，如果餐廳送上的餐點過鹹，葉稱，應叫餐廳換掉重新再煮，「梗係唔好食，太鹹對健康無益」。自言近年較注重健康的他，卻經常有飯局，要平衡在於進食七分飽，「唔好食完捧住個肚返屋企，酒亦都要少飲」。他又推介慢食，享受食物本身味道，「以前返工買個飯盒食，5分鐘、10分鐘就食完，𠵱家一餐飯起碼食一、兩個鐘」。而伴隨少鹽飲食，要有做運動習慣，他平日會練氣功、游水及打乒乓波，才能繼續享受美食。
from:
http://hk.apple.nextmedia ... 150723/19229268
