郭晉安噚日講笑話會約無線高層食飯再約記者影相，擺明寸視帝勁敵林峯（小圖）。
郭晉安喺劇集《與敵同行》入面奸到出汁，連發哥周潤發都讚佢做得好，雖然安仔有份爭無線台慶個視帝獎，不過佢嘅呼聲好似唔夠林峯同夏雨高。最近林峯俾人發現黐實高層樂易玲，另邊廂李司棋又話不屑有人做小動作，是非滿天飛。
*
噚日安仔喺大埔超級城宣傳《有隻僵屍暗戀你》時話：「珍姐（曾勵珍）有打畀我鼓勵我，佢都希望我得獎，我星期三約咗珍姐食飯，我唔介意成日食，呢個階段啲人特登影相做宣傳。」安仔呢句話，唔知係咪寸緊林峯呢？點知佢之後仲好抵死咁話：「平時喺公司同珍姐都有見面交流，或者我喺公司時，通知你哋嚟影相。」
*
至於同場宣傳嘅仲有動漫Maggie 李曼筠、孟瑤同賈曉晨等一班《有》片演員，動漫Maggie 同孟瑤忽然收起性感，不過穿緊身衫嘅孟瑤就現咗個小肚腩出嚟。
孟瑤收起惹火身材，改著短裙騷靚腿，拍友一樣受落。
雖然動漫Maggie 噚日打扮相當密實，不過仍然遮唔住佢突出嘅上圍。
