每年無線11月台慶，視帝視后獎項總是爭崩頭。今屆憑住人氣劇《家好月圓》，林峯、夏雨和陳豪都有份角逐。賽前一直被睇高一線的林峯，最近爆出負面消息，有傳「荷媽」李司棋向高層篤背脊，指林峯拍《家》劇時經常遲到及打機，令他嗱視帝機會大減。
不過一心爭贏視帝的林峯，原來一早已經為自己鋪定路，練得金剛不壞之身。日前記者發現他密會兩位有份左右選舉結果的TVB 高層樂易玲及何麗全，其間對樂易玲特別體貼入微，多次搭她膊頭、按頸又掃背。
對於林峯私底下請高層食飯，荷媽表示：「各人有各人做法，我不屑做呢啲小動作！」擺明為有份角逐視帝的老死夏雨出頭。
台慶頒獎禮愈接近，藝員的爭獎招數就愈密集，戰況愈見激烈。以往演員請高層食飯，甚至送名貴手袋、首飾的傳聞不絕於耳。一位無線內部人士透露：「其實台慶前兩三個月，班高層就好唔得閒，好似陳志雲、樂易玲、何麗全同曾勵珍、梁家樹咁，除咗要開會傾邊個獎應該邊個藝員嗱至啱之外，本身亦有好多飯局，有啲藝員都會諗計為自己爭取嘅！」
並肩行送上車
10月6日晚，記者就發現今屆憑《家好月圓》成為視帝大熱的林峯，戴上貨車帽，秘密與無線製作資源部總監樂易玲和非戲劇組總監何麗全會面。他們在尖沙嘴帝苑酒店共晉晚膳至晚上9時許，離開時在大堂門外，林峯先禮貌地送何麗全上車道別後，就與樂易玲肩並肩步行一段路嗱車。其間二人雞啄唔斷，林峯多次主動搭女方肩膊，樂小姐亦沒有避忌。行至樂小姐座駕旁，林峯殷勤地送她上車，自己才截的士離開。
陳志雲暗寸
本周二（14日）晚，《家》劇在尖沙嘴Misto 餐廳搞慰勞宴，記者就請樂小姐食飯一事問過林峯，他聽罷有點愕然，停頓兩秒後才開口回答。
林：我平時都有同佢哋（指樂小姐等高層）食飯，因為我喺TVB 成10年……又唔係成日食，一得閒就會囉！
記：我哋影到你同樂小姐密會。
林：咁就梗係啦，因為我唔使拍劇嘛，食飯好正常，我爭太多身邊朋友太多餐，唔好話高層啦！
記：咁點解又唔約陳志雲食飯啦！
林：……好難約，佢嗰啲時間好難就㗎！
雖然林峯話陳生時間好難就，但慰勞宴當晚，陳志雲一見林峯，第一句竟然暗寸話：「佢冇請過我食飯呀！」搞到林峯鬼咁尷尬。
事後記者亦問過樂易玲，她最初未有承認近日與林峯私底下有飯局。「冇呀，佢點解唔請我！快啲叫佢嚟！（喺帝苑酒店見到你哋……）我哋唔止係食飯，仲傾吓新唱片宣傳，仲撞到Paco （黃栢高）同吳雨……老實講，如果佢（指林峯）請我食飯我都會去嘅，但我諗佢唔會為獎請食飯。我哋咁多artiste ，咁幾時食得晒呀。」
司棋唔爭獎
而一直覺得「Jo 飽」夏雨才適合當上視帝的李司棋，亦擺明撐硬老友，她還主動問記者是否拍得林峯請高層食飯？當她得悉後，態度企硬，表示一定唔會咁做。
記：有指林峯請高層食飯爭獎？
李：我冇興趣知呢啲嘢，各人有各人做法……乜你哋影到佢請高層食飯咩？
記：係呀，同樂小姐食飯。
李：咁可能係好朋友飯聚啫，未必因為獎唔獎嘅事。林峯都係細路仔，冇機心嘅。
記：你點睇請食飯爭獎？
李：我點解要咁做，從來都唔會，亦不屑做呢啲小動作！
嘉穎屈佘累事
據知今屆視帝人選除了林峯外，眾高層亦考慮過夏雨和鄭嘉穎二人，最弊樂小姐一向視為親生仔的鄭嘉穎，最近發生「屈佘」事件，緋聞女友周麗淇成為苦主，搞到鄭嘉穎形象下跌，加上他06年曾嗱過視帝，今屆他所提名的《與敵同行》收視亦不足30點，難以與《家》劇競爭，樂小姐亦似乎愛莫能助。
夏雨簽長約猶豫
無線其實早在拍《家》劇前，已經想與夏雨斟洽簽為期至少3年的經理人合約，可惜夏雨遲遲都未應承簽此「賣身契」。在夏雨未成為無線親生仔之前，無線對他奪視帝一獎的決定，亦頗為猶豫。就簽長約一事記者問過夏雨，他承認仍未落實簽約，「都會傾㗎啦，萬大事都傾。（有傳你簽咗約就嗱視帝！）邊有可能，又唔係交換禮物。」一位夏雨身邊人透露：「其實夏雨好在意視帝呢個獎，上年台慶嗱唔到最佳男主角獎係好唔忿氣，所以就算TVB 猛話要同佢簽約，佢都話要考慮清楚囉！」
夏雨遲遲未動筆，林峯已經出招，難怪李司棋會戥夏雨唔抵，急忙出口幫老友一把。台慶距今還有大半個月，視帝鹿死誰手，看來仲有排鬥。
結緣30年
於70年代已加入無線的李司棋，與夏雨相識超過三十年，彼此感情深厚。75年，二人在劇集《民間傳奇》結緣，之後合作無間，包括《書劍恩仇錄》、《楚留香》、《射鵰英雄傳之鐵血丹心》等。80年中期，李選擇放棄幕前移居加拿大，90年回流香港後，第一部劇集亦是與夏雨合拍的《香港蛙人》。01年李不幸患子宮頸癌，休息了近六年。07年回巢TVB ，再度夥拍夏雨合作《溏心風暴》。難怪去年夏雨飲恨視帝，成功問鼎視后的李司棋事後亦公開力撐：「如果夏雨嗱埋獎就最完美。」
甘家內訌
自從爆出林峯拍劇遲到兼掛住打機，又請高層食飯博嗱獎後，除了李司棋擺明撐夏雨做視帝外，其餘《家》劇演員都分為兩派，甘家上下頓時四分五裂。
夏雨無奈
夏：我唔信食餐飯會有獎拎囉！
記：林峯今年個勢好強！
夏：個個都強，TVB 好多藝員都強，我就有信心冇把握。
記：司棋姐好撐你，希望你嗱視帝！
夏：冇話撐唔撐同企邊面嘅。佢幫到我啲乜啊，佢都無能為力啦！
撐雨派
陳豪暗寸
記：林峯最近頻頻請高層食飯，被指爭獎喎？
陳：臨頒獎禮實有呢啲新聞，唔使咁執住嘅。我唔否認其他人會咁樣諗，亦唔會排除有人請食飯爭獎，但係我自己就唔會咁做喇！我覺得林峯今年唔需要咁做，佢個勢咁好，我覺得佢嗱視帝，Jo 飽嗱我最喜愛角色啦！
記：佢拍劇係咪成日喺廠打機？
陳：咁後生仔一定有自己嘅世界，只要唔影響拍劇進度就得喇！
楊怡撐硬
楊怡：「覺得阿峯唔會咁樣做（指請高層食飯），我自己就冇咁做過喇！我希望Jo 飽可以嗱到視帝啦！」
林峯自辯
被指做小動作爭視帝，林峯向記者呼冤：「如果我係介意獎項，擔心呢樣嘢，我就會避忌（唔請高層食飯）啦！唔好話高層定咩層，我爭身邊朋友太多餐飯喇！」
挺峯派
子珊代解話
徐子珊：「我諗阿峯唔會咁做，最近好幾次食飯都係成班《家好》演員一齊食，我諗大家都係誤會啫！」
樂易玲幫口
樂易玲：「如果林峯出於感謝嘅心，答謝公司俾機會佢，咁請食飯都無可厚非。」
陳法拉講好話
陳法拉力撐林峯是好演員，說：「佢唔會拍戲打機，拍咁多個月，遲一、兩次在所難免。」
有前科 飯局後嗱視帝
無線眾小生中，鄭嘉穎算是樂易玲最疼錫的一個，樂小姐經常出席他有份演出的活動，以行動支持。早年鄭與戴思聰的合約糾紛，樂小姐亦出面調解。06年二人更多次被拍得私下有飯局，其中在黃毓民開設的牛肉麵店，鄭向樂小姐遞茶又遞筷子，十分殷勤。同年台慶頒獎禮，鄭嘉穎更憑《天幕下的戀人》奪得「最佳男主角」大獎，當時他在台上致辭時亦不忘多謝樂小姐。台慶完畢後數天，鄭嘉穎又被拍得請樂小姐和恩師劉家昌到駿景軒打邊爐，以示「唔忘本」。看來想奪獎除了努力、演技好之外，還要另類付出至夠醒目。
視帝五強
今年視帝爭持激烈，在十個提名當中，歐陽震華、馬國明、林文龍、苗僑偉和劉松仁，氣勢較弱，早已成炮灰。
而五強內，暫時最有機會則是從未嗱過視帝的林峯和夏雨。
郭晉安
劇集：《古靈精探》
勝算：★★
忽評：雖然安仔在《古》劇表現出色，加上收視爆燈，最高達44點，可惜安仔向來屬於無黨派藝員，而且他又嗱過兩屆視帝，看來他陪跑居多。
鄭嘉穎
劇集：《與敵同行》
勝算：★
忽評：鄭嘉穎在《與》劇中被奸角郭晉安搶晒鏡，加上最近他負面新聞太多，嗱獎機會微乎其微。幸好鄭是曾勵珍的御用演員，又是兩大高層陳志雲和樂易玲愛將，故亦曾是該獎考慮之列。
陳豪
劇集：《家好月圓》
勝算：★★★
忽評：去年挾著「得得地」一角連奪視帝和最喜愛男角色獎，今年再度冧莊絕非易事，他勝在觀眾緣佳，萬一他在觀眾投票中佔大比數，分分鐘扭轉賽果。
夏雨
劇集：《家好月圓》
勝算：★★★★
忽評：去年失落視帝獎項，夏雨也承認唔開心。今年夏在《家》劇Jo 飽一角更加搶戲，加上他在本月將落實會否簽TVB 經理人約。如夏雨成為TVB 親生仔，嗱視帝在望。
林峯
劇集：《家好月圓》
勝算：★★★★★
忽評：林峯在《家》劇的角色討好，不過今年更是他加入TVB 第十個年頭，加上他最近冇劇在身，頻頻約高層食飯，亦一直深得樂易玲的和曾勵珍眷顧，奪視帝指數暫時領先。
已升上神檯的李司棋語氣堅定地表示，靠請食飯換獎是小動作，她斬釘截鐵說：「我唔需要做呢啲嘢！」擺明暗寸林峯。
本周二《家好》慰勞宴當晚，記者要求傳不和的李司棋和林峯合照。合照大功告成後，林峯想再搭住李膊頭，可惜李掛住與記者傾偈，令林十分尷尬。
上周一（6日）晚上九時，戴住貨車帽的林峯與樂易玲一同步出尖東帝苑酒店。二人傾唔停嘴，當樂橫過馬路時，林更用手捉住樂的手臂，示意她睇車，十分細心。
之後林更搭住樂背脊，步行了近5分鐘，直至親自送完樂上車後才搭的士離開。
