周一（18日）眾主持要準時九點入廠準備，但仍未換奧運制服的葉翠翠，遲了足足15分鐘，才施施然行去服裝間換制服。
奧運開幕至今兩星期，質素參差的主持除經常被網友圍插外，論是非最多，要數「股神港姐」葉翠翠，先放暗箭隊丘凱敏，暗窒豬扒港姐張嘉兒，再伸一腳踢對頭陸詩韻講錯嘢，似乎個個有錯，係翠翠冇錯。
雖然翠翠經常扮演慘情受害者，但據知她在奧運前的主持訓練課程，十堂只返得一半，兼且每次做節目亦老奉唔備課，要其他主持幫拖執生。
表現差又多是非，有指翠翠做完奧運主持，將被無線掟入雪櫃無限期冷藏。
在化妝間，素有牙齒印的葉翠翠（圈）和陸詩韻（右）各據一方，二人連招呼都懶打。
與陸詩韻同一陣線的胡諾言（右一），多次走埋陸身邊傾偈，但對旁邊的葉翠翠卻視而不見。
翠翠放暗箭隊丘凱敏，指佢向監製打毒針，令自己臨時被飛出黃金時段。對於翠翠此番「陰謀論」，其他主持都戥丘不值，遂群起杯葛葉。周一（18日）早上九點，葉翠翠、陸詩韻和胡諾言主持早上奧運節目，在化妝間，葉與素有牙齒印的陸詩韻自然各據一方，而現場所見，胡諾言亦只與陸交談，二人明顯同一陣線，與葉劃清楚河漢界。
事先冇備課的葉翠翠，經常頭耷耷照稿讀，被網友指不專業。
以往零負面新聞的丘凱敏，忽然被指是金手指，難怪她動氣說：「有人作料！」
玩失蹤唔備課
除在奧運期間興風作浪，葉翠翠本身亦犯下多宗罪，導致天怒人怨。每位主持事前都需要上十堂奧運課程加深知識，但據知葉翠翠只上得一半課。「個個主持都上足堂，就連Do 姐咁忙都唔例外，但翠翠就成日唔見人，上親堂又講電話，好唔專心。」上完十堂課程後，導師都會派一大疊資料給各主持，但就有工作人員從未見過葉帶資料做節目。「見佢喺break 過陣都唔使睇資料，最初以為佢喺屋企背晒，點知節目出街過陣，先見佢猛望住啲稿讀資料，其他主持好多次幫佢執生。」
主持奧運期間，葉翠翠亦試過臨時請病假，要其他主持臨急接手工作。「上個禮拜四（14日），翠翠朝早八點幾打電話返公司話自己唔舒服要請病假，因為個節目十點就要出街，我哋連搵其他主持頂佢都嚟唔切，最後得番阿水（司徒瑞祈）同陸詩韻兩個頂硬上。」一工作人員表示。
拎住一大疊奧運資料的陸詩韻，表示會在事先一晚熟讀，以免自己講錯說話。
講風涼話
除放箭插丘凱敏外，葉翠翠亦狂辣拍檔，對於被抽離黃金時間而調去朝早做節目，葉曾表示「不開心」，令同做早上節目的胡諾言、陸詩韻等人對其言論感不滿。被問到張嘉兒和李思雅有可能被飛出北京直播室而要做外勤主持時，葉又贈興說：「仲好啦，可以現場直擊喎！」而早前有網友指她在直播時把國家體育館容納人數18,000人講錯為8萬人，她反駁說：「如果大家知道前因後果，就知我冇講錯，我唔想講第二個同事。」將矛頭轉到另一女主持陸詩韻身上。
與翠翠冇偈傾
對於葉翠翠衰三宗罪，與他拍檔的胡諾言坦言與她「好少傾偈」。「坦白講，大家都係做番自己崗位，同佢比較少傾偈，不過我唔理其他人，最緊要自己熟讀資料，事先一定備足課。（翠翠係咪成日缺席上堂？）唔……我唔知，唔好問我。（你覺得翠翠表現點？）佢係港姐，又拍劇，不過做主持就要俾多啲時間咋！」至於另一主持陸詩韻則說：「其實我都係做番自己嘅嘢，顧掂自己先啦，所以我冇留意佢（指葉）開工前有冇睇熟啲資料。」
此「估」不同彼「股」，唔備課靠斷估的葉翠翠，睇嚟係時候要好好檢討下。
葉翠翠乘剛落地，價值36萬的七人車到灣仔與父母晚膳。
得知有記者在門口，便用調虎離山計，安排父母行正門離開，自己則由濕滑污糟後巷走人（下圖）。問她為何走後門，她說：「食得平就話cheap ，食得貴又話高貴，唔想俾人亂寫。」
鬼祟走後巷
上周六（16日）忽然富貴嘅葉翠翠與父母到灣仔一日本料理晚膳，當得知有記者在門口時，葉竟撇甩父母，寧願行污糟後巷逃離現場，事後她更直指「有人放料」。
