年輕人有創意，但往往沒有成本兼沒有耐性，以至度好了的一盤生意無疾而終。
但今年只有17及16歲的會考生Sony 及Ann 卻抱住「堅持到底」信念，由初初同學們「吹水」話搞生意，到目前成功在旺角信和商場格仔鋪出售自繪貨車帽，當中她們經歷「想過放棄合作」、「被網友指罵『白癡』」等遭遇，幸好，最終因為堅持，這盤生意才能夠持續。
目前她們自繪的貨車帽，為她們每月帶來額外數千元的收入，即使賺的不算多，但對於中五學生來說，已是一項成就，況且，她們獲得前所未有的創業經驗。對於未來，她們異口同聲表示：「我哋要開鋪、創立屬於我哋嘅品牌。」
Sony及Ann 的性格不同，Sony 外向兼好動，Ann 則內向且文靜，訪問期間，她們經常為了一些小事互相拗嘴，由那個先拍照到由那個解答記者問題，她們的對答很多時都是互相單單打打，「妳視覺藝術科係全級第二嘛，妳勁啲！我唔識答呀！妳答啦！」滿是「小姐」脾氣的Sony 凡遇到不想解答的問題時，便交給較成熟的Ann 解答。
不過，她們看似性格不合，卻是最合拍，又是校內最「死黨」的兩個，恰如電影《愛鬥大》中的江若琳與Janice Man 既是最好朋友也是最大競爭對手。Sony 說：「我哋中一同班嗰陣時已經好friend ！佢（Ann ）成日嚟我屋企玩，我哋乜嘢都可以講一餐！」即使讀到中四及中五，她們不同班，但友誼依然不變，「我讀5C ，Ann 讀5A ，但我哋有共同修讀嘅視覺藝術科目，我哋都好鍾意設計同創作啲無厘頭嘅嘢，可能就係呢份喜好將我哋兩個拉埋一齊掛！」
將吹水付諸實行
Sony及Ann 在九龍塘聖母玫瑰書院就讀，是應屆中五會考生，正當每個同學在會考後只一心一意急覓暑期工之際，她們兩個卻在想怎樣創業。「我哋成班同學傾偈時，成日話想開乜鋪物鋪，但都係得個講字！唔會實行！而我哋就要實行埋，仲要做到成功為止！」Sony 及Ann 將她們的名字結合，設立品牌叫「Soanny 」，簡稱「SA 」，她們把自己設計的圖案畫在時下流行的貨車帽上，再縫製襟章及加上小飾物，創作出屬於自己品牌。
「而家好興戴貨車帽，我哋見通街都係用啲冇意思嘅英文字求其印上頂帽上，就話要賣成2百幾蚊一頂！咁不如我哋自繪圖案咪仲靚。」Sony 說在帽上自繪圖案靈感來自一位朋友送贈的一頂自繪帽。「講真，嗰頂自繪帽真係畫得幾核突，兩邊對角，一邊係Simon 跑緊、另一邊係Simon 老豆響度大嗌，頂帽嘅構圖一啲都唔集中，如果唔係個朋友有啲心思畫嚟送畀我，我早就掉了！」不過，亦正因為這頂自繪帽，令向來十分喜好視覺藝術科目的Sony 靈機一觸，在五月初完成會考考試後，萌起創立自繪貨車帽品牌的念頭來。
入貨設計售賣三部曲
「響考完會考後，咪諗吓有乜可以賺錢囉，既然諗到造自繪帽去賣，就即刻搵死黨阿Ann 幫手。」二人一拍即合，並隨即籌備開業大計，她們首先設定了整個創業時間表，內容例如怎樣訂購帽子、圖案設計的分類、推廣及在那里和如何出售等，當一切議定妥當後，便依住時間表進度行事。
「首先要解決入貨嘅問題，我哋走勻深水
，發現間間鋪個價都唔同，有啲用料好差都賣成$50一頂，好彩最後用咗3日時間，響汝州街搵到一間鋪，只係賣$10一頂帽，而且啲料好靚。」所謂靚料就是帽本身戴上頭感覺舒服外，還可以讓她們畫上圖案而不甩色。
雖然找到貨源，但她們卻在設計圖案上出現了嚴重爭拗，並在其中一次爭拗中，幾乎散「band 」收場，Sony 說：「我哋每一個圖案畫完都會畀對方睇，睇吓畫得靚唔靚，但Ann 就一味話我畫得唔好，淨係得啲圖形冇意思，一嬲之下，我咪話唔玩囉！但之後，我知道Ann 係想啲圖案可以表達到意思，最後大家有共識先至冇事咋！」原來在圖案設計方面，Ann 執住要表達出有意思的信息才算滿意，「我唔想啲設計好似市面賣啲帽咁，淨係得啲冇意思嘅英文字母，我希望創作嘅圖案係可以表達到一個意思，而個意思係獲得別人認同，例如Don't Smoke 、Shut up 等等。」
想好了設計，她們又要找渠道去賣貨品。在這一點上，她們就有一致共識，認為yahoo 拍賣網最受年輕人歡迎，當她們將完工的自繪帽放上拍賣網後，不足數天，便有客人致電買帽，「見有反應，我哋諗住租格仔箱做display ，等啲客響網上買咗貨，可以去格仔箱度嗱貨，啲人先會有信心去買。作為學生嚟講，放貨上網賣同租格仔箱，成本輕先至負擔得起。！」
Sony走勻旺角多個商場，便決定租信和商場2樓的KeyBox 格仔鋪，「個格仔鋪月租5百蚊，唔使畀上期同按金，畀五百蚊就可以即刻開鋪，而且個位都算旺！」而事實上，自從Sony 及Ann 創作的貨車帽在KeyBox 格仔鋪出售後，該貨車帽更成為鋪內其中一樣最好賣的貨品，KeyBox 老闆Catherine 說：「佢哋自繪嘅帽平均每日賣出6頂左右，以佢哋中五學生自家創作嚟講，已經算唔錯！」
每日賣出6頂帽
現時她們出售的自繪貨車帽售價為$78，當扣除貨本後，每頂盈利約為$60，以平均每日售出6頂計算，每日可賺取約3百多元，而為了增加銷量，她們還會按客人要求，替客人自繪圖案，「例如之前有個客要求響頂帽上面用碎石砌個心形，我哋咪用咗4個鐘頭，先響深水
買料，再即刻做畀佢囉！」這頂心形碎石帽，收費約$140，收費視乎難度而定，一般根據客人「柯打」製作的貨車帽盈利會更高，約1百元一頂左右。
看似一帆風順的生意，其實在營運過程中，她們也要經歷一些挫折感，「初時，我哋都抱住一定有錢搵嘅心態嚟做，點知響做測試時，發現好多畫筆都甩色同墨『化』，最後至少曬咗十幾頂帽後，先至搵到一款唔會甩色同墨『化』嘅彩色marker 。」
另外，她們亦曾在網上被人痛罵產品「低能」、「白癡」，令她們信心受損，「當時真係好hurt 㗎，一心諗住做啲嘢出嚟，一定有人欣賞，點知轉頭就俾人鬧，但諗諗吓，佢哋只不過係少數唔鍾意我哋產品嘅人，但事實上可能有更多嘅人鍾意我哋產品呢！況且有人鬧，即係代表有人留意我哋產品，都算係好事！」
年輕人玩意宣傳
在宣傳方面，由於她們設計的自繪貨車帽主要針對年輕人市場，所以宣傳上，都著重於一般年輕人的玩意身上，「我哋會響facebook 、MSN 、blog 同同學身上宣傳話有呢門生意！雖然之前都諗過舉行大型活動如model 示範，或者製作單張等等，但最後都係冇錢乜都做唔到。」
目前，Sony 及Ann 都已找到暑期工作，Sony 任演藝人助理，而Ann 則任畫班助教，雖然這個自繪帽工作成為她們暑期工以外的一份兼職，但收入卻十分理想，令她們喜出望外，「我一個星期淨係得兩日有得教人畫畫，每次兩個鐘，都係賺到$90，同賣出一頂帽差唔多。」Ann 說。
面對將來，她們異口同聲表示，「我們會一直創作下去，除咗會繼續不斷改善我哋嘅圖案外，我哋還會開鋪頭，建立自己品牌專利等等。」兩位小妹妹由構思、入貨、決定售賣點以至宣傳，者看到她們的雄心壯志，也不禁說聲：「祝妳們成功！」
開業資料
租金：$500
雜費：$1,000
總投資額：$1,500
每月開支（5月）
營業額：12,000
格仔箱租金：$500
入貨：$5,000
盈利：$6,500
邊度入貨?
Sony 及Ann 製作自繪貨車帽，所需的材料包括：淨色貨車帽、小飾物及上色用的marker 等。
淨色貨車帽：主要批發點位於深水
長沙灣道一帶，Sony 及Ann 在深水
汝州街一間批發店入貨，每頂帽的成本價約$10，每次訂貨數目至少兩打。除此之外，香港亦有不少服裝批發公司兼營貨車帽批發，如amax （27395168）等。
小飾物：主要批發點位於深水
汝州街一帶，一般一小袋約一百個小飾物售價約$10至$20不等。
Marker ：她們使用的PILOT PERMANENT INK MARKER ，不甩色及不會墨「化」，一般文具店有售，每支售價約$10。
專家意見：手作仔難持久
香港市務學會主席嚴啟明認為，Sony 及Ann 設立的自繪貨車帽品牌「Soanny 」原則上是有利可圖，這正如時裝一樣，只要是潮流及能吸引到顧客注意並購買，是可以經營的。但她們的產品太住重自繪，產量少而成本高之外，亦阻礙了產品的多元性，他說：「可能在潮流過後，產品唔賣得，到時曬時間同人力。」他建議她們應找一些大公司合作，出售設計，大量生產減低成本，再配合宣傳推廣，品牌才可發展。
Ann （左）及Sony 自創品牌Soanny 及初嘗創業滋味，在旺角信和租了格仔箱賣貨，對自繪貨車帽銷情充滿信心。
Key Box 負責人Catherine 表示Sony 及Ann 自繪貨車帽在上架後，銷量十分理想。
設計草圖︰在每頂貨車帽製作前，她們會先在書簿上畫草圖。
自繪貨車帽所需的工具十分簡單，間尺、鉸剪，但最重要是選用不甩色的PILOT PERMANENT INK MARKER 。
