有人死要做玉女，有人鍾意行性感，Freeze 三嬌成立一年，經常被人笑、被人睇死玩唔長，遲早拆夥。最近，三嬌之一嘅石詠莉（Sukie ）部署跳出Freeze 作個人發展。嚟緊Sukie 仲會推出個人EP 。
點解？「我唱歌好聽過佢兩個！」踩得咁直接，唔怪得要自己搵食，但Sukie 否認內訌，仲話自己雖然跳出嚟嘗試單拖發展，Freeze 仍然會三位一體。
Sukie 既想單飛又驚飛唔起，但本刊發現，三嬌老闆蕭定一近日已秘密揀女，有意替Freeze 換新血，壯大這支紅粉兵團。
陳奐仁叫好
Freeze 響暑假再出新碟，會以性感跳舞組合形象引fans ，更請來多名音樂猛人，陳冠希舊拍檔陳奐仁、陳奕迅唱片監製王雙駿及容祖兒唱片監製舒文等。陳奐仁話新碟未開始錄音，但已經好期待，肯定會放啲新元素入Freeze 。陳奐仁：「Freeze 可塑性高，除咗性感，仲可以響音樂上玩得熱鬧啲，加啲hip hop 元素都幾好玩，唔係以前騷性感咁簡單囉，我相信佢哋會做得好好！」
直擊秘密揀女
石詠莉將個人發展，本月初「一元製作」亦密鑼緊鼓招募新人，連日來都不斷有妙齡少女到「一元」面試，當中有模特兒、OL 和大學生。據了解，唱片公司係要為Sukie 離隊加入新血，而新嬌亦隨時要整形變靚啲。
面：面試員 H ：應徵者Holy
面：你介唔介意整容？
H ：（摸鼻）我鼻唔夠高，有需要都可以整嘅。
面：咁隆胸呢？
H ：唔想喎！
面：我哋要sexy ，你得唔得？
H ：得嘅！sexy 成點先？
面：著泳衣宣傳呢？
H ：（面紅）都ok 嘅！
一直有傳蕭定一旗下的「一元製作」對Freeze 三位成員大細超，每次出場石詠莉（Sukie ）都被安排企中間搶晒鏡，上年推出首張EP 《Golden Eyes 》又只得Sukie 有獨唱歌〈情難控〉，早前有人將Sukie 響公司春茗獨唱片段放上YouTube ，有網友更話Sukie 如果能夠撇甩Freeze 仲有前途。
雙嬌冷待
本月9日，石詠莉接受本刊訪問，親口證實唱片公司安排她嘗試個人發展，嚟緊將會推出個人唱片，Freeze 危危乎。當被問到係咪受公司重用，Sukie 好有信心話：「我唱歌好聽過佢兩個！」發覺自己「出口傷人」得罪好姊妹甄穎珊同陳樂榣，Sukie 先補鑊：「123（甄穎珊）演戲叻啲、Alley （陳樂榣）樣樣都ok 㗎。」
Sukie 仲自爆姊妹冇戥佢高興：「我話佢哋知公司畀我獨立發展，但佢兩個冇反應呀，冇恭喜我，淨係話：『加油啦！』、『畀心機！』咁囉。」講完Sukie 傻笑。而陳樂榣同甄穎珊知道Sukie 率先跑出，唔敢異議，甄穎珊話：「佢第一個加入呢間公司，佢第一個作個人發展都好正常啫！」
隊友互插
曾經住埋一個月做真人騷，Freeze 三嬌不和被人現場報道。響記者面前三嬌照樣互數對方，咁唔夾唔怪得要分開發展啦。
甄穎珊（左）：Alley 少少嘢都鬼咁執著，咪成日嗌交囉！
Sukie （中）：123（甄穎珊）好長氣，成個阿婆咁。
Alley （右）：Sukie 失憶㗎，同佢講完又唔記得！
金牌監製
雖然Sukie 對於自己跑贏隊友顯得好雀躍，但唱片公司就話Freeze 拆夥言之尚早，發言人話：「Sukie 係會作個人發展，但Freeze 仲未拆夥住，佢哋今年仲會出碟，搵嚟陳奐仁同王雙駿監製，Freeze 仍然會『大搞』。」好多組合話唔拆唔拆最後咪又拆，聽住先啦！
面試員叫應徵者Holy 擺5個甫士，Holy 就模仿瘦身廣告嘅動作，不過略嫌生硬。擺完一輪甫士之後，Holy 問：「使唔使唱歌你哋聽？」second in 先啦。
Sukie 最初加入蕭定一的「一元製作」，以為會自己出碟，點知被安排組成Freeze ，近日她終於可以個人發展，證明自己有足夠本錢。
Sukie 獨唱片段被放上YouTube ，有網友勁讚唱得好過Stephy 。如搵個唔走音嚟比，Sukie 會開心啲。
網友勁撐
本月16日Freeze 出席蘭桂坊啤酒節，Sukie 依舊佔中間位成個隊長咁款。
