升cup 有運行，05年港姐葉翠翠入行星運平平，不過，為了養家，葉翠翠戮力執靚個樣兼大放變幻球，自此曝光率大增，豬籠入水。
葉翠翠十分識撈，每次行騷、剪綵拍廣告例必低胸上陣。早前，本刊發現她獨自到中環CECILIA YAU 試戰衣，件件都deepV 大露背，未有打好底的翠翠南北半球輪住倒，極度香艷。
上月22日下午3時，葉翠翠獨自到中環CECILIA YAU 試晚裝，當日包到密密實實的她，從的士下車便急急腳走入店內，之後邊講電話邊試晚裝。素顏的翠翠先後試了五、六件晚裝，大晒C 奶及白滑玉背。其間她揀了一套紫紅色晚裝，由於裙腳過長，令她險些絆倒。揀了半粒鐘，試了多套衫的翠翠，反轉成間晚裝店，卻空手而出，然後搭的士鬆人。
性感博機會
事後記者致電葉翠翠，她表示︰「過年接咗好多騷，嗰日係去贊助嘅時裝店試衫。吓？走光？一定冇，TVB 訓練有素，就算平時我都做足打底工夫，做藝人最緊要識保護自己，我記得嗰日試晚裝，我有打底，所以絕對萬無一失。（你揀親嘅衫都係低胸喎？係咪因為個胸大咗，信心都大咗？）依家學識著衫，身材睇落係好過以前，著得性感啲真係多啲工作機會，係人都鍾意睇靚嘢。」
又難怪葉翠翠咁搏，原來她爸爸去年開始退休，養家重任落在她肩頭。「我依家係屋企經濟支柱，老竇退休後再冇宿舍住，又要交租又要請工人，媽咪嘅腎病亦要定期覆診，少個崩都唔掂，所以我會好努力工作。」
收入增三倍
葉翠翠為了養家密密做，剛拍完新劇《疑情別戀》，又要開另一套《盛世人傑》，除了主持《娛樂直播》及《事必關己》，過年期間她還接下不少剪綵及商場騷，就連泳衣騷，葉翠翠都殺埋。去年尾葉翠翠正式與無線簽經理人約後，底薪加到約二萬，騷價亦由萬五加到二萬至四萬，每月平均收入約十萬，比未簽約時多兩、三倍，難怪近日她透露有意買新車，又話想儲錢買樓做業主。
密食當三番
05年，模特兒葉翠翠雖然奪得港姐冠軍，但由於與無線非經埋人合約，所以卸任後工作不多，而她與無線簽的一年一騷約，連底薪都冇，07年她惟有狂接泳衣騷及商場騷維生，但每月只約兩至三萬收入，尤幸無線見她肯捱肯搏，去年尾改簽經埋人約，變咗親生女，待遇即時不同，不但主持、工作不斷，劇集亦一個接一個，更由串星榮升女配角，據知她近日為新劇趕工，過年期間亦只能放三天假。
素顏的葉翠翠雖然冇化妝，但皮膚白晢，加上小導彈身材，十分香艷。
離罩險走光
由於晚裝的胸位闊，葉翠翠穿上時有點離罩，更差啲走光。
當日所見，葉翠翠楝的不是低胸就是露背，盡晒身材。
葉翠翠試衫的時裝店，一件晚裝三萬至四萬不等。
