個市終於開鋪大，前晚美國無市，但歐洲跌到翻艇，恒指低開後跌幅擴大，下午跌至21,710點，收報21,758點，重挫2,061點。國企指數挫1,620點，報11,912點，大市成交1,558億元。期指收報21,803點，跌1,785點，比現貨高水45點，成交131,528張。
美國停市香港「機」
各類股份全線下跌，藍籌下挫8至10%者比比皆是，成交最多的中移動（941）[股價及相關新聞]跌7.5%，最多散戶捧場的控（005）[股價及相關新聞]挫8%、港交所（388）[股價及相關新聞]挫9.86%、平保（2318）[股價及相關新聞]發A股兼發債，股價瀉12%；國壽（2628）[股價及相關新聞]跌16%，散戶愛股紛紛滑落，港交所由最高位268元跌到昨日收市的156.3元，跌幅超過四成，大行在二百元樓上仍然不斷出報告唱好，信以為真的老散全部領。有人留意到早前港交所行政總裁亦行使了認股權，未知是否趁高沽貨，若然無咁做，雖然認購價好低，至今仍不必蝕價，但就交多一筆稅。
港股跌得咁急，理由之一是美股無開市，基金為了應付贖回，在香港重手「機」，大力沽貨，所以好多基金愛股都被全面拋售。無論點樣解釋，指數接連下跌幾日，仍然一舉下挫二千點，亦出了一眾中環茶友的意料之外，看淡的人也有，亦有人睇到22,000點，但無估到佢兩日跌逾3,000點。港股急插跌破23,500點的250日平均線，而且仲大幅下探，論走勢差到極，後市已無險可守，美股開市前急急減息四分三厘，有茶友話，布殊掟出個減稅方案，被對手阻頭阻勢，雖有減息救亡，若然咁都唔得，就要再諗第二「籠」。
目前買股最大的風險是股災，好多人話而家已經係股災，但陸Sir認為未夠災，以我心目中的股災，要一日跌20%、30%，而且仲係美股杜指咁跌，咁就似，以杜指現價計，要一日跌2,000點過外，就叫有災味。
買股要用閒錢
話現在未係股災，唔係為呢個大市辯護，而係話若最後出現股災，大市唔跌多2,000點、3,000點不出奇，有十分之一機會出現更壞情況時，15000點都可以有得見。所以而家買貨者，就要問自己，怕唔怕股災，萬一咁不幸出災，自己守唔守得到，要守兩三年。好多朋友問有無「安全」的股票，我就話無啦，股市風高浪急，無股票安全，若唔係有多餘錢想做「投資的我」（即係預備好要長唔放），心大心細者，最好持盈保泰。
陸Sir同中環茶友睇法一樣，港股和環球股市跌成咁，好快有結局，一係開大，一係開細，開大跌鑊甘，由美股開始，急插成災，實行一鑊熟。開細就美國政府同西方大國央行聯合再放水救市，最好仲挾埋美國民主黨，同意執政共和黨的救市大計，咁美股隨時頂住唔跌，港股亦會彈，開大開細好快會知，因為環球股市都唔頂得咁耐啦，亦唔會在現價企定定。
港股隨了睇美國有無絕招救市之外，就要睇亞爺，聞說阿爺亦唔想股市插得太急，若急跌上證綜指插近4,000點時，阿爺又會出口術托。
中環茶友仲有個陰謀少少的觀點，話美股好有政治市味道，通常選舉年股市應該無得跌，但今次布殊落任前，經濟真係太差，好難頂多一年，睇白都好可能硬陸，問題係究竟係幾時硬陸，若然年頭衰退，年中復甦，對執政共和黨較為有利，相反，如果年中衰退，去到年尾復甦，在野民主黨上台機會高唱入雲之餘，仲可能變成行運醫生醫病尾，所以現在布殊同財長保爾森死力救市，站在民主黨立場，最有利唔係唔救市，而係陰陰手拖，同布殊跳番兩part「逢逢拆」慢舞，等經濟碌落去到年底先復甦，情形一如當年老布殊競選連任，經濟跌到一仆一碌，點知到連任失敗，公佈出來的數據，就顯示復甦來臨，有人話，當年若然經濟早三個月回升，以老布殊在中東大勝的威望，又點輪到克林頓上台，如果今次民主黨可以在布殊身上重施故技，咁就為之very good，因老布殊中過招，布殊政府開始睇通呢點，自然一搶閘開動財政同減息機器救火啦！
如果您喜歡這篇文章，請按「讚」或分享給您的朋友，以示鼓勵。
