陶大宇emoji使用率極高？《心花放》招牌動作原來係自創

以前提到陶大宇，啲人即刻令人聯想起「師奶殺手」呢個稱號，不過o依家再講都有啲out。之但係陶大宇近排喺網上又有新意思，講緊嘅係佢喺N年前嘅電視劇《心花放》入面嘅招牌動作，當時佢呢個用手捂住塊面再有一聲呀嘅動作，幾乎喺每一集都出現。

而近期又hit返喇！事關蘋果去年尾出咗一個名為「Face Palm」嘅emoji公仔，而呢個公仔同陶大宇《心花放》招牌動作極度相似，而呢個公仔喺推出之後深受用家使用，連「高登瓊姐」都忍唔住開post留言話：「對住蠢人蠢事、煩人煩事，陶大宇emoji每分鐘平均使用率，近月已經突破300萬次。（非正式統計）！」而陶大宇亦都有喺微博回應呢件事，佢話：「無論真與假，不要太認真，開心就好，哈哈哈……」

日前佢一支公去咗跑馬地食嘢，《蘋果》打畀佢做訪問，講到「陶大宇emoji」呢年事，大宇就話：「之前係有fans同我講先知，好似啲點擊使用率好高，其實呢個動作係嗰陣《心花放》專登加入去嘅小動作，我覺得呢個小動作百搭，開心嗰陣用又得，唔開心嗰陣用又得，冇乜所謂，但係我自己就好少用！」
from:http://hk.apple.nextmedia ... 170620/20062382

要講陶大宇，不得不提佢個「師奶殺手」稱號，想當年（其實都係講緊1990年代），大宇憑《壹號皇庭》彈出，大受太太級觀眾歡迎，其後被冠以師奶殺手稱號！呢位師奶殺手鼻祖唔講得笑，無論喺邊間電視台効力，佢嘅地位都不受動搖。

而同大宇一齊拍《壹號皇庭》嘅歐陽震華（Bobby）其後亦成為另一位師奶殺手，Bobby嘅經典作，手指腳趾加埋都唔夠數，包括《陀槍師姐》、《皇家反千組》、《洗冤錄》、《金裝四大才子》、《施公奇案》，至近年嘅《東坡家事》同《一屋老友記》等，其中《壹號皇庭》》同《陀槍師姐》成個系列都可以見到Bobby身影，其他亦有唔少劇集係添食嘅，足以證明Bobby嘅「收視」勁有保證，亦不負其師奶殺手之名。

至於已為人父嘅陳豪，由大銀幕踩入公仔箱，同樣大受歡迎，獲封師奶殺手，佢喺《妙手仁心II》中飾演心臟科醫生MC，最近半夜都有重播，其後陳豪參演嘅劇集，就算佢未必係擔正嗰個都好，角色都好出，例如《絕世好爸》、《金牌冰人》、《秀才遇著兵》、《金枝慾孽》、《溏心風暴》、《珠光寶氣》等，全部都好有話題。而數到最有話題性嘅，當然要計佢喺《帝女花》中嗰句「同朕check吓…」啦！

講得《妙手仁心》，點少得「程至美」吳啟華？吳啟華亦屬師奶殺手一員，佢憑程至美成功俘虜女性觀眾嘅心，而佢呢個暖男醫生形象，令佢相隔15年後、即2013年演出《On Call36小時II》時，有好多觀眾都recall番佢演程至美嘅記憶。

提到吸觀眾，羅嘉良又點走得甩？佢初出道喺長篇劇《季節》中已備受注目，後來去到90年代演嘅《情濃大地》《天地男兒》更加係越嚟越多fans追捧，到最經典嘅《難兄難弟》、《創世紀》、《天地豪情》等更令觀眾翻煲再翻煲！早前播完嘅《與諜同謀》，雖然有網民話佢同以前有差別，但無損其師奶殺手之威力！
from:http://hk.apple.nextmedia ... 170620/20062374

今年53歲嘅陶大宇，初出道事業暗淡，直至92年喺《大時代》做益蟹、《壹號皇庭》系列飾演師爺Michael，到《刑事偵緝檔案》系列終於擔正。由於劇中多飾演痴情男角色，入屋之餘仲大受師奶歡迎，固有《師奶殺手》之稱。

雖然陶大宇當年已有固定女友黃慧寶(阿寶)，不過拍劇時，陶大宇依舊艷福無邊，試過喺《刑》劇中，佢同拍檔郭可盈傳緋聞。直至多年後，二人一齊接受專訪時，陶大宇先自爆同郭可盈試過約會睇電影《侏羅紀公園》。當時陶大宇亦曾經問過郭可盈，如果自己媾佢會點？

雖然雙方有過電，但礙於當時郭可盈已經同林文龍拍拖，所以最終冇同陶大宇行前一步。郭可盈喺訪問中話自己同大宇，性格都係「凸」，若果拍拖十足火星撞地球，所以好彩冇開始過。

到07年，當時已同阿寶結婚7年嘅陶大宇，因同郭羨妮(Sonija)合作拍《學警出更》咀出真感情，老婆阿寶率先喺周刊宣布同陶大宇離婚，更親口講出第三者就係郭羨妮。

當時郭羨妮多次呼冤話自己唔係第三者，而陶大宇亦解釋同老婆離婚，並非因為郭羨妮，但二人形象一夜間插水，大宇多年建立嘅好好先生形象崩壞，「師奶殺手」封號亦告除名！相反郭羨妮就多咗個新花名─狐妮。

陶大宇當時拍完無綫劇集《和味濃情》後，就被迫返大陸拍劇過冷河；女方則被飛出新劇，又被廣告商臨時換走，收入接近零。

為自保，有傳郭羨妮急撇陶大宇，強調二人冇發展機會。為避開對方，更遠赴加拿大。霎時間人財兩失嘅陶大宇，當年有指鳥倦知還積極翻撻前妻。除咗狂發短訊冧對方，更以愛犬做王牌，藉探狗為名，藉同前妻有多啲互動，令佢可以回心轉意。

另一方面，疑因愛成恨嘅陶大宇，事後被問到郭羨妮捲入電視台「四朵淫花」傳聞時，大宇指對方榜上有名，唔會覺得意外，因為對方有太多類似新聞，句句有骨。遭隔空挑釁嘅郭羨妮，隨即還擊話：「如果係咁我覺得佢好無聊囉！」
from:http://hk.apple.nextmedia ... 170620/20062388