【紳士風度】
陶大宇離開時遇正有食客入內，即好有風度幫手開門。
陶大宇當年憑劇集《刑事偵緝檔案》系列，成為第一代師奶殺手，近年專注喺內地拍劇搵真銀。今個月初見佢一支公去咗茶餐廳食麵，仲同老闆呃水吹。
【雞啄唔斷】
陶大宇同茶記老闆好熟，傾到眉飛色舞。ＤＶ圖片
幫食客開門
當日下晝6點幾，大宇去到跑馬地新昌明茶餐廳開餐，佢揀咗近門口一張枱坐低，叫咗碗麵同凍檸茶醫肚。前後食咗20分鐘左右，不過佢食飽後冇即刻埋單走人，反而繼續坐低同老闆吹水。佢哋非常好傾，就算有食客眼望望都冇理，吹足30分鐘水大宇至肯離開。當佢行到去門口時，咁啱有食客準備入內，大宇非常有風度客串做門僮，幫對方開門。
大宇前日接受電話訪問時，話餐廳老闆係枱波波友，幫人開門都係方便人方便自己，佢話：「好小事啫，嗰度地方淺窄，冇乜所謂。我同老闆識咗好耐，佢係我啲枱波友，而且佢同好多藝人都好熟，所以有好多明星去食嘢。」大宇話無綫都有搵過佢傾合作，如果要拍嘅話，最少要有3、4個月留喺香港，但目前佢每星期都會上內地幾次，所以驚時間夾唔到，如果就到時間，都會幫無綫拍劇。
撰文：馮仁昭
from:
http://hk.apple.nextmedia ... 170620/20061526
