已做了32年兒童節目的譚玉瑛，今年3月尾將約滿無綫，獲安排轉職任兒童節目顧問及新簽藝員合約，譚玉瑛姐姐日前受訪稱很樂意迎接新挑戰，但對近日有指她不滿被逼走，她稱：「唔明點解報道寫到咁，其實我好滿意公司今次安排，對我嚟講都係一條新出路，（想拍戲？）有都想試吓，但又擔心日夜顛倒適應唔到！」她於3月尾將為《放學ICU》作最後錄影，問無綫可會為她舉行告別派對？高層余詠珊昨稱不是告別，反而要為她舉行簽約儀式，並已計劃安排譚玉瑛姐姐做《東張西望》內的資訊節目主持。
譚玉瑛
手足情深阻街獲體諒
陶大宇扶二哥睇跌打
大宇二哥拗柴受傷，前日大宇專登車二哥去睇跌打。
【旺角】曾經被封師奶殺手嘅陶大宇，近呢幾年轉攻內地做商演同拍嘢，好少喺香港出現。不過，好耐冇見嘅佢，前日下晝兩點左右忽然喺旺角山東街出現，原來佢二哥整親腳，佢專登車二哥去旺角山東街一間醫館睇跌打，真係手足情深。
大宇二哥左腳拗柴，包住紗布舉步為艱。
二哥上緊車，大宇都有揮一揮手唔該後面車主。
大宇照顧家人上車後拿拿聲開車走人。
舊年中秋節，大宇喺微博上載三兄弟及媽咪合照。
感激司機忍讓
大宇喺醫館逗留咗半粒鐘就先行離開去攞車，跟住駛部車去到醫館樓下，諗住方便二哥上落。之但係，嗰個路口位唔可以泊車，加上當時啱啱轉綠燈，大宇停低部車打死火燈等二哥，結果阻住晒後邊啲車，搞到後面啲車狂響按。
咁啱有個交通督導員行過，大宇即刻解釋二哥腳傷唔方便行路，嗰位交通督導員聽到之後都畀酌情權冇驅趕大宇。好在唔夠一分鐘，大宇二哥睇完跌打，見佢左腳包住紗布，個樣好痛苦咁，要由女親友扶住行過嚟，而大宇見到即刻落車幫手，跟住同交通督導員揮手之後，再同後面部車車主耍冧講番句唔好意思，認真有禮貌，然後就拿拿聲開車走人。
噚日打電話比大宇，佢話：「我二哥喺屋企拗柴入醫院，噚日同佢出院之後，即刻帶佢去睇吓跌打。喺呢度我都要多謝位交通督導員同嗰位司機，多謝佢哋明白體諒。」
採訪、攝影：楊浩賢、黃曉程
