高登巴打話吳業坤係「偽毒坤」，係有原因。明明個樣好毒，但就係靠毒搵食，由周秀娜到吳若希到Aka到YouTuber小花Hana，「食女無數」；依家傳出坤哥最新目標，係喺《愛‧回家2》飾演家姐嘅龔嘉欣。
其實都唔係最近傳㗎喇，你睇「偽毒坤」鋪路冧龔嘉欣BB，由主動(爭)做外賣仔、等接放工黐車坐、明明冇戲份都返廠等龔嘉欣，又約佢食早餐，嘩條路幾咁迂迴幾咁漫長。但偽毒坤，等到了。
昨日有報導、影埋相同片，大爆偽毒坤爭取約到龔嘉欣撐枱腳食早餐，為女方慶祝26歲生日。本月5號，兩人喺將軍澳一齊食早餐，坐埋一角玩低調，但偽毒坤笠住頂帽，好難睇唔到。兩人全程低頭細細聲，龔嘉欣更十分警覺，一早索到記者陣除，仲索性睥實鏡頭擺明要對方收手。
「坊間」有傳，偽毒坤追女招數，都係不離扮毒、包裝到毫無殺傷力咁令人唔會特別防備，或者係喺啲女神面前扮慘慘豬、話自己成日俾女飛，激發女神「母愛」同憐惜之心。次次work。
留意番添喎，龔嘉欣之前對於爆出呢段「姊弟戀」，係表明「有啲嬲」，仲話自己鍾意啲成熟啲嘅，更話明「今次我覺得過份！」但唔夠一個月，偽毒坤已經成功爭取單對單同龔嘉欣食早餐慶祝生日，似乎……
from:
http://hk.apple.nextmedia ... 151217/19415448
