阿Lam用代表作《分分鐘需要你》形容自己，需要的對象自然是愛妻沙麗。攝影：周樂恆
40年……千億個夜晚，林子祥（阿Lam）憑獨特雄渾的歌聲縱橫樂壇40年，入行前在美國教打網球，由揸拍打波變揸咪唱歌，阿Lam很快找到事業上的最愛，感情上最愛就是情人知己葉蒨文（沙麗），現年68歲的阿Lam與沙麗結婚20年，他笑言看著沙麗大，沙麗就看著自己變老，對阿Lam來說，男人的浪漫並不是火腩飯，《分分鐘需要你》才是他對沙麗的濃情蜜意！
撰文：余燕儀
林子祥由入行前教人打網球到轉做歌手，原來早已命中注定，他坦言：「只係教人玩嚇，除咗教人打網球，都有喺三藩市YMCA教人彈結他，當時自己又開始作曲，寫咗好多歌，音樂係我最愛。」能夠屹立樂壇40年，阿Lam好感激：「好開心！因為冇諗過一定要去到乜位置，可以維持40年仲錄歌寫新歌，對住咁多觀眾演繹，梗係好開心。」
在樂壇的每一個晚上，阿Lam怎看得與失？他說：「得到係用歌感染咁多觀眾，我覺得好似生出嚟就畀我做呢樣嘢，可以演繹到我創作嘅歌，最驕傲我諗係可以跨到幾代歌迷，好似boxing婆婆80歲都聽我嘅歌，佢啲仔同孫都開始認識我啲歌，我肯定係好滿足。失去係私人空間，做最簡單私人嘢都俾人誇到變曬形，呢樣比較失望，但冇辦法呢行就係咁，我個仔都一樣，俾人跟蹤佢都好無奈，我話呢啲你要接受，總之大大方方去面對。」
阿Lam早前68歲生日，沙麗送上招牌鬍鬚蛋糕慶祝。微博圖片
96年結婚至今，阿Lam說是看著沙麗長大。
資料圖片
阿Lam40年來曲風多變，令人容易記起他的金曲。
分分鐘需要沙麗
如果揀一首歌代表自己，阿Lam想了想說：「《分分鐘需要你》，因為隻歌好直接冇扮嘢，如果你畀到出嚟嘅愛係咁，收到一樣係咁多，我希望每次表演，都畀到呢樣嘢。」如果將歌曲代入一個人，阿Lam分分鐘最需要誰？他毫不考慮說：「沙麗，因為我哋結咗婚20年，但識咗30幾年，識佢嗰時佢10幾歲，我係睇住佢大，佢睇住我老，哈哈哈，我哋由開始已經做到好好朋友，亦經過咗我離婚過程，我啲細路點樣好接受佢，到𠵱家結咗婚20年，我哋嘅溝通仲好好多，關係不止夫妻，佢又好似我個妹我個女，我又好似佢爹哋又好似佢個仔，呢啲係要咁長時間，兩個人先有咁多共鳴。」
問多年來有否試過嗌交？阿Lam說：「好少喎，唔會係嗌到唔再講嘢嗰啲，我哋就算點嗌，第二日或一兩日後返去原位，好平和。」是否每次都是阿Lam讓步？他說：「唔係㗎，我諗我哋兩個都差唔多，尤其最近五年更加溫和，真係㗎，咁耐時間個人梗會隨和啲，如果越大年紀仲係激動好辛苦，年齡會幫到好多嘢。」
追求不同形式的唱法，是阿Lam40年來的堅持。
老婆唔煩有分寸
好多男人都嫌老婆煩，阿Lam卻說：「我唔覺得佢煩，佢係一個好有分數嘅人，尤其我哋講嘢點到即止，唔會講多餘嘢，大家好明白大家個性，時間同年齡將條路變成好易行。」問最鍾意沙麗甚麼？他微笑說：「佢諗嘢同做嘢好有分寸，唔會諗啲多餘嘢，佢計得好準。」
場地提供：卅二公館
from:
http://hk.apple.nextmedia ... 151129/19392160
