入行40年擁神級唱功的林子祥（阿Lam），現年68歲寶刀未老，前晚在電視節目唱金曲《吖嗚婆》技驚四座，連白髮婆婆都興奮得聞歌起舞跳到似打boxing，短片在網上瘋傳，網友勁讚阿Lam唱功冇得頂，狠批後輩叫幾聲就叫歌手；而阿Lam都被這位婆婆的可愛舞吸引，在網上開帖公開尋人請婆婆睇騷，他說：「佢肯定唔係吖嗚婆，佢係天仙美女。」
唱腔雄渾獨特的殿堂級歌手林子祥，入行40年的他將於明年1月假紅館舉行「林子祥佐治地球四十年演唱會」，前晚播出的無線節目《Sunday靚聲王》，擁神級唱功的阿Lam演繹金曲《吖嗚婆》，技驚四座，觀眾不但聽到拍曬手，有位白髮婆婆更high到企起身跳舞，雙手不停揮動好似打boxing般，可愛程度爆曬燈，阿Lam都被吸引刻意走到她面前唱歌，氣氛熱爆。
可愛舞收視升
有網友將短片放上網，留言：「阿Lam唱快歌！阿婆笑呵呵！跳舞跳得un曬籮！」片段火速在網上瘋傳，大批網友勁讚：「興奮到阿婆都打拳」、「快歌治療法……老人痴呆有得醫喇」，還狂踩後輩歌手唱功冇得比：「𠵱家啲後生仔應該跟前輩學嚇唱功先啦，唔係你叫幾聲就叫歌手㗎。」由於阿Lam的神級唱功加白髮婆婆的可愛舞，這集節目收視升了兩點有24點，約155萬觀眾收看。
不少網友都熱烈彈琴，呼喚阿Lam開騷請婆婆去睇，昨日阿Lam的演唱會facebook專頁火速行動，在網上開帖廣傳尋人啟事：「全城尋找《Sunday靚聲王》Boxing馬舞可愛婆婆」，阿Lam接受本報電話訪問，對於被網友勁讚唱得好，他說：「Good！好呀，做得開心呀，嗰晚已經感覺到，嗰班觀眾好high，所以唱得好開心。」有否留意阿婆都好high？他說：「我都未睇節目，因為噚晚唔啱時間，一陣返到去會睇。佢哋話有呢個boxing阿婆，呢個白頭髮阿婆邊個嚟？我都唔知，我咁啱唱嗰隻歌唱到嗰個位，佢喺度跳到咁樣樣令我幾開心，我咪望住佢，我知道𠵱家全城搵緊佢喺邊。」
【起身準備】
阿Lam在電視節目曬神級唱功，白髮婆婆high到聞歌起舞，他表示好想請婆婆睇騷。電視圖片
【興奮捉手】
【約定睇騷】
林德信及林德懿前晚在場都笑到合不攏嘴。電視圖片
「佢係天仙美女」
問到覺得婆婆跳得如何？阿Lam笑說：「佢咪boxing咁囉，喺度打緊拳，不過佢好得意，我見到佢好開心，真係奇怪。」連阿婆聽你唱歌都咁興奮，阿Lam說：「Well，好開心，不過佢肯定唔係吖嗚婆，佢係天仙美女，𠵱家想搵番佢，希望佢啲仔女、阿孫認到佢係邊位，等我哋可以搵到佢，到我做演唱會時，可以搵到佢出嚟，我再對住佢唱《吖嗚婆》就好。」會否請婆婆上台一齊跳？阿Lam說：「唔會啦，我諗我會落去尋找佢。」
採訪：皓騫
from:
http://hk.apple.nextmedia.com/entertainment/art/20151020/19339549
