將於明年1月舉行演唱會的林子祥（Lam），雖然日前一家四代同堂出席演唱會記者會，但昨日有週刊指阿Lam與由粉絲變女友的阮麗嘉（Fiona）暗撻多年，他們至今仍未斷纜，阿Lam被影到和Fiona於石澳的香閨密會後，於清晨閃走，阿Lam更兼做柴可夫送女方去中環。礙於大家都有另一半，所以阿Lam與Fiona約會時都比較避忌。
Fiona當日有份出席阿Lam演唱會記招，還坐在阿Lam女兒後排。資料圖片
阿Lam與沙麗是圈中的恩愛夫妻，他直指雙方的朋友互相認識。資料圖片
「開騷前有花邊嘢」
對於與Fiona傳緋聞，阿Lam昨日到商台受訪時稱：「每次開騷前都會有呢啲花邊嘢，上次又係，不過沙麗（葉蒨文）已經話寫錯咗佢個名，話快啲叫佢哋改番佢。佢（Fiona）同佢boyfriend（包玉剛前女婿鄭維健）係我最好朋友嚟㗎，係我啲波友，車婉婉都成日同我哋打波。嗰日同婉婉打完波，係婉婉提議去嗰度食嘢，出到嚟我仲錫咗婉婉一啖，佢又唔登嗰張，冇得講。」
問到阿Lam做柴可夫，他表示因為兩位好友上幾個月炒掉司機，湊巧當時是載女方去男友office。不過追問阿Lam為何在清晨時分離開女方的香閨，他未有正面回應，只笑笑口說：「邊個會咁早起身呀？得我先至咁早起身，我4點半左右就出去飲茶，一個人，因為冇人咁早起身㗎嘛，灣仔好多茶檔已經熟曬，一入就知我要食乜。佢話我8、9點早起，嗰陣我已經返去瞓第二轉覺喇。」
阿Lam坦言獲沙麗信任，他說：「我同沙麗都20年夫妻，各有自己一堆朋友，佢有佢一班打羽毛球嘅朋友，golf又好咩都好，男女都有。做咗夫妻，要信任，而且大家都識㗎。嗰日演唱會記招，佢兩個（指Fiona同男友）都嚟咗。到我演唱會，佢哋都會嚟，邊個嚟我都錫，我哋係鬼佬鬼婆嚟㗎嘛，朋友又錫親人又錫。」
採訪：張俊銘
攝影：陳順禎
from:
http://hk.apple.nextmedia ... 151105/19359904
